Komuna e Mitrovicës nuk do t’i dekorojë sheshet e qytetit për festat e fundvitit

23 nëntor 13:06

Drejtuar nga nënkryetari i komunës së Mitrovicës, Faruk Mujka, të hënën është mbajtur mbledhja e radhës e Bordit të Drejtorëve, ku janë diskutuar dhe shqyrtuar çështje të rëndësishme nga fushëveprimi i Bordit, që janë në interes për qytetarët e Mitrovicës.

Fillimisht drejtori i Arsimit, Ismet Ferizi, ka njoftuar ekzekutivin lidhur me rekomandimin e Institutit Kombëtar të Shëndetësisë Publike për mbylljen e çerdhes publike “Gëzimi Ynë”, SHFMU “Eqrem Qabej”, SHMLT “Arkitekt Sinani” si dhe shkollën e muzikës “Tefta Tashko” pas rasteve të konfirmuara pozitiv me virusin Covid-19 të disa mësimdhënësve dhe nxënësve, ku nga IKShPK-ja është kërkuar vetizolimi i stafit dhe nxënësve për 14 ditë, si dhe dezinfektimi i tërë objektit të çerdhes.

Me këtë rast, drejtori Ferizi ka bërë me dije se këto shkolla do të vazhdojnë mësimin online, sipas skenarit ‘C’ të përcaktuar nga Ministria e Arsimit.

Po ashtu në këtë mbledhje nënkryetari Mujka ka thënë se për shkak të gjendjes së krijuar nga pandemia Covid-19, këtë vit nuk do të dekorohen sheshet e qytetit të Mitrovicës, pasi që prioritet i komunës është shëndeti i qytetarëve dhe mbështetja e familjeve me gjëra ushqimore apo mjekësore që jetojnë në kushte jo të mira ekonomike.

Gjithashtu lidhur me vendimin e MSh-së që vendosi Mitrovicën në zonën e kuqe, nënkryetari Mujka ka kërkuar nga qytetarët të respektojnë masat në fuqi, si dhe t’u shmangen ambienteve të mbyllura, pasi që këto ditë numri i të infektuarve në këtë qytet ka qenë më i madh.

“Si pasojë e kësaj jemi futur në zonë të kuqe. Andaj bashkërisht duhet të tregohemi vigjilent dhe të kujdesshëm, sepse ne po detyrohemi t’i mbyllim institucionet relevante siç janë shkollat dhe çerdhet, me qëllimin e vetëm për të ruajtur shëndetin e fëmijëve tanë”, ka thënë Mujka.

(Qendresa Rama / Epoka e re)

Lajme të sponsorizuara

Të fundit
Drilon Hajrizi do të jetë kapiten i Kosovës në ndeshjet…