Konfirmohet zotimi me BERZh-in për investime në projektin ‘Qyteti i Gjelbër’

21 nëntor 11:54

Kryetari i Komunës së Prishtinës, Shpend Ahmeti, ka nënshkruar të mërkurën konfirmimin e zotimit për Bankën Evropiane për Rindërtim dhe Zhvillim (BERZh) në emër të Komunës së Prishtinës për Prishtinën “Qytet të Gjelbër”. Qëllimi i këtij konfirmimi është rritja e bashkëpunimit ndërmjet Komunës së Prishtinës dhe BERZh-it për të promovuar projektet e veçanta në kuadër të idesë për Qytetet e Gjelbra (Green Cities).

Banka Evropiane për Rindërtim dhe Zhvillim (BERZh) do të sigurojë fonde për ta mbuluar koston e këshilltarëve që do ta bëjnë hartimin e planit të veprimit për Qytetin e Gjelbër, këshilltarë të cilët do të angazhohen si ekspertë të fushës përmes rregullave të prokurimit të BERZh-it.

Komuna e Prishtinës do të angazhohet në përpilimin dhe zbatimin e këtij plani përmes krijimit të një Komiteti Drejtues, që do të udhëhiqet nga një zyrtar i caktuar komunal; mbledhjes së informacioneve të nevojshme në kohën e duhur; dhe caktimit të personave përgjegjës që do të bashkëpunojnë me këshilltarët e angazhuar nga BERZh-i.

Palët do të bashkëpunojnë në përgatitjen, financimin dhe zbatimin e së paku një projekti në vlerë prej 2 deri në 150 milionë euro, që ka të bëjë me menaxhimin e mbeturinave të ngurta; ujërat e zeza; ndriçimi publik; transporti urban; si dhe efikasiteti i energjisë dhe energjia e ripërtërishme. Është paraparë që projekti i parë që do të vijë si rezultat i këtij Konfirmimi të nënshkruar sot, të jetë “Prishtina Public Building Projekt”, që ka të bëjë me masat për efikasitet të energjisë në ndërtesat publike.

/Epoka e re/

Lajme të sponsorizuara

Të fundit
Federata e Karatesë e Kosovës njofton të gjitha klubet nga…