Koreja e Veriut dhe ajo e Jugut rivendosin komunikimin ndërkufitar
04 tetor 2021
| 11:50
Koreja e Veriut dhe ajo e Jugut kanë rivendosur kanalin e komunikimit ndërkufitar.
Seuli ka njoftuar se të dy shtetet kanë zhvilluar telefonatën e parë që nga gushti.
“Me rivendosjen e linjës së komunikimit Jug-Veri, Qeveria vlerëson se është siguruar një bazë për rimëkëmbjen e marrëdhënieve ndër-koreane”, është thënë në deklaratën e Ministrisë së Unifikimit të Koresë së Jugut.
Koreja e Veriut e mbylli linjën telefonike në gusht, në shenjë kundërshtimi ndaj stërvitjeve të përbashkëta ushtarake midis Koresë së Jugut dhe Shteteve të Bashkuara.
Agjencia zyrtare e lajmeve e Koresë së Veriut KCNA tha më herët se linja do të rihapet, por i bëri thirrje Seulit që të punojë drejt përmirësimit të lidhjeve të tendosura ndërkufitare.