Banka Botërore ka publikuar raportin “Të Bërit Biznes” për vitin 2020, i cili përfshin 190 ekonomi në gjithë botën.

Raporti ka vlerësuar zbatimin e gati 300 reformave në periudhën maj 2018 – maj 2019.

Kosova në këtë raport renditet e 57-a.

Në të, mes tjerash, është thënë se Kosova e ka bërë më të lehtë menaxhimin e lejeve të ndërtimit, ka përmirësuar furnizimin me energji elektrike, ka forcuar mbrojtjen e investitorëve të pakicave dhe ka lehtësuar zbatimin e kontratave.

Lista e Bankës Botërore kryesohet nga Zelanda e Re, ndërsa pas saj vijnë Singapori dhe Hong Kongu.

Në fund të listës, ndërkaq, janë Somalia, Eritrea dhe Venezuela.

Raporti thekson se ekonomitë me përmirësimin më të dukshëm në “Të bërit biznes: janë Arabia Saudite, Jordania, Togo, Bahrejni, Taxhikistani, Pakistani, Kuvajti, Kina, India dhe Nigeria.

Në periudhën 2018-19, këto vende kanë zbatuar një të pestën e të gjitha reformave të regjistruara në të gjithë botën, është thënë në raport.