Pavarësisht prej krizës së shkaktuar nga pandemia Covid-19, remitancat e punëtorëve emigrantë në vitin 2020 kanë kapur shumën e jashtëzakonshme prej 548 miliardë dollarësh dhe parashikohen të arrijnë në 589 miliardë dollarë në vitin 2021. Megjithatë, kostoja e dërgimit të remitancave mbetet e lartë për shumicën e kanaleve të monitoruara të transferimit krahasuar me objektivat e vendosura nga G20 dhe OZhQ-të e OKB-së.

Ulja e kostove të remitancave dhe rritja e shërbimeve të disponueshme për emigrantët dhe përfituesit e remitancave në mbarë botën mbetet në thelb të agjendës globale të zhvillimit. Në këtë kontekst, Banka Botërore (BB) është duke zbatuar projektin Greenback në disa vende të botës.

Në Kosovë, Banka Botërore ka partneritet me Bankën Qendrore të Republikës së Kosovës (BQK). Kjo nismë synon ta rritë efikasitetin e remitancave ndërkombëtare dhe t’i rritë përfitimet që ato sjellin për familjet individuale dhe ekonominë, kryesisht nëpërmjet edukimit financiar, ngritjes së kapaciteteve dhe koordinimit të palëve të interesit.

Projekti Greenback fillon në komunitetet lokale që veprojnë si laboratorë për analizimin e çështjeve që lidhen me remitancat specifike për komunitetet, duke krijuar dhe pilotuar zgjidhje që mund të rriten për të përfituar si nga ana e ofertës ashtu edhe nga kërkesa e tregjeve të remitancave. Projekti promovon vazhdimisht bashkëpunimin midis palëve të interesit lokale dhe kombëtare për të mbështetur një ndryshim kuptimplotë.

Megjithëse e kufizuar në shkallë, kjo qasje nga poshtë-lart prodhon mjete dhe mësime të nxjerra, të cilat kanë efekt të konsiderueshëm demonstrues për komunitete të ngjashme dhe mund të rriten lehtësisht përtej fushëveprimit dhe kohëzgjatjes së përfshirjes së Bankës Botërore në secilin vend.

Miliona ekonomi familjare anembanë botës varen nga remitancat, një burim i të ardhurave të ekonomive familjare që vijnë nga anëtarët e familjes që kanë emigruar në vende më të zhvilluara për arsye ekonomike ose të tjera.

Remitancat e emigrantëve përfaqësojnë në mënyrë kumulative flukse hyrëse esenciale financiare për shumë ekonomi në zhvillim. Si përqindje e Bruto Produktit Vendor (BPV), Kosova zë vendin e parë si vend pranues i remitancave në Evropë. Flukset hyrëse të remitancave vlerësohen të kenë arritur vlerën prej 1.5 miliard dollarësh në vitin 2021, duke përbërë 16.7 për qind të BPV-së së Kosovës. Popullsia me prejardhje nga Kosova që jeton jashtë vendit (diaspora), në vitin 2017 vlerësohet të jetë 833 739 persona, që është e barabartë me 46.36 për qind të njerëzve që jetojnë në Kosovë.

Pandemia Covid-19 ka ngadalësuar migrimin e ri dhe ka rritur migrimin e kthimit për herë të parë në historinë moderne. Kjo ka vënë në sprovë sektorin e remitancave dhe ka bërë që flukset e remitancave të bien gjatë muajve mars dhe prill 2020. Megjithatë, flukset e remitancave janë rikuperuar në muajt në vijim të vitit 2020 dhe gjatë gjithë vitit 2021, pasi emigrantët vazhduan të dërgojnë para në shtëpitë e tyre, duke grumbulluar nga kursimet e tyre ose fondet e tjera emergjente në të cilat kanë pasur qasje.