Komisioni Qendror i Zgjedhjeve (KQZ) ka pranuar tri kërkesa të ndara nga Kryesuesit e Kuvendeve Komunale për Leposaviq, Mitrovicë e Veriut dhe Zubin Potok.

Lajmi është bërë i ditur për mediat nga zëdhënësi i KQZ-së, Valmir Elezi, të mërkurën pasdite.

Këto kërkesa janë pranuar nga grupe nismëtarësh të cilët kanë iniciuar procedurën për largimin e kryetarit të komunës nga funksioni, raporton “EO”.

Elezi ka treguar para mediave përmbajtjen e kërkesave të cilat i janë drejtuar KQZ-së.

“Komisioni Qendror i Zgjedhjeve ka pranuar në adresën zyrtare tri kërkesa të ndara nga Kryesuesit e Kuvendeve Komunale për Leposaviq, Mitrovicë e Veriut dhe Zubin Potok. Përmbajtja e këtyre tri kërkesave është e njëjtë. Së pari, të tre Kryesuesit e Kuvendeve Komunale kanë kërkuar nga KQZ, që t’i ofrojmë informatat zyrtare për anëtarët e grupit iniciues se a janë votues të komunave përkatëse. Së dyti, të njëjtit kanë kërkuar që t’i ofrojmë informatat lidhur me numrin e përditësuar të votuesve të regjistruar në këto komuna, mbi bazën e të cilit përllogaritet numri minimal i nevojshëm i nënshkrimeve prej 20 për qind”, ka njoftuar  Elezi.

Më tutje, ai ka treguar se KQZ-ja është duke i trajtuar këto kërkesa dhe brenda afatit do t’u kthejnë përgjigje.

“Mund t’iu konfirmoj se këto kërkesa janë duke u trajtuar dhe brenda afatit 5 ditor do të përgjigjemi. Për këto përgjigje, do të bashkëpunojmë edhe me Agjencinë për Regjistrimin Civil pasi lista votuese buron nga ekstrati i Regjistrit Qendror Civil”, ka thënë Elezi.

I pyetur se çfarë do të ndodhë me komunën e Zveçanit pasi një kërkesë e tillë nuk është dorëzuar në KQZ, Elezi ka sqaruar se nëse eventualisht në KQZ paraqitet ndonjë kërkesë e ngjashme, të njëjtën do ta trajtojnë si rastet tjera.