Kryetari i Partisë Demokratike të Kosovës (PDK), Memli Krasniqi nëpërmjet një video-adresimi drejtuar të rinjve, ka ftuar ata t’i bashkohen platformës “Rinia 2022”.

Ai ka thënë se rinia përmes angazhimit të hershëm politik mund të kontribuoj për t’i ndryshuar për të mirë gjërat në shoqëri.

Si dikush që rrugëtimin politik e ka nisur si i ri, Krasniqi ka thënë se janë tri gjëra që ju garanton  dhe të cilave ua njeh peshën për të rinjtë që i bashkohen PDK-së: Hapësirë për veprim, besim në angazhim dhe përgjegjësi në vendimmarrje.

“Pas shpalljes së zgjedhjeve të brendshme të Rinisë Demokratike të Kosovës, ne po lansojmë platformën digjitale rinia2022.org – ku secili mund të regjistroheni e të anëtarësoheni brenda 30 sekondave. Afati për t’u regjistruar dhe për t’u bërë pjesë e procesit zgjedhor është deri më 20 nëntor”, është shprehur kryetari i PDK-së.

Krasniqi ka thënë se Kosovës i duhet energjia, vullneti dhe besimi i rinisë për ta përshpejtuar rrugën e zhvillimit për të cilën aq shumë ka nevojë.

“Secili që anëtarësohet do të jetë i barabartë në ndikim, duke garuar për përgjegjësi udhëheqëse, ose duke zgjedhur ata që besoni se do t’ju përfaqësojnë më së miri në krye të Rinisë Demokratike, në Degë, ose në Qendër. Klikoni në faqen rinia2022.org, plotësoni formularin dhe bashkohuni me ne në rrugëtimin tonë të përbashkët për një Kosovë më të mirë!”, ka thënë Krasniqi.