Kryeministrja britanike, Theresa May ka thënë se do të dorëhiqet më 7 qershor, duke hapur rrugën për një kryeministër të ri të Britanisë së Madhe.

Në një deklaratë emocionale May ka thënë se ajo kishte “bërë më të mirën” për të respektuar rezultatin e referendumit për daljen e Britanisë nga BE-ja.

Ajo ka shprehur “keqardhjeje të thellë” se nuk kishte qenë në gjendje të përfundonte procesin e Brexit-it.

Megjithatë, May ka thënë se një kryeministër i ri është “në interesin më të mirë të vendit”.

May ka qenë nën presion për të dhënë dorëheqje pasi disa deputetë të partisë së saj kanë dalë kundër planit të ri të Brexit-it, të cilin May ka thënë se do ta dërgojë për votim në Parlament.

Që nga janari i këtij viti, parlamenti britanik ka hedhur poshtë tri herë marrëveshjen e largimit të Britanisë nga BE-ja.

Britania është dashur të dalë nga Bashkimi Evropian më 29 mars por kryeministrja, Theresa May, nuk ka arritur t’i bindë ligjvënësit britanikë për të votuar marrëveshjen e arritur me udhëheqësit e BE-së.

Megjithatë ajo ka arritur të marrë pajtimin e BE-së për shtyrjen e afatit të Brexit-it deri më 31 tetor, datë kjo kur Britania duhet të dalë nga BE-ja me ose pa marrëveshje.