Këshilli i kryetarëve në kuadër të Asociacionit të Komunave të Kosovës (AKK) ka mbajtur të mërkurën takimin “online” lidhur me situatën e tanishme pandemike nëpër komuna.

AKK-ja ka bërë me dije se kryetarët e komunave në këtë takim kanë diskutuar edhe për masat e tanishme, zbatimin e tyre, efektin dhe për situatën pas datës 18 prill kur skadojnë këto masat e reja.

Takimin e ka hapur dhe kryesuar kryetari i Asociacionit të Komunave të Kosovës, Imri Ahmeti, i cili ka njoftuar kryetarët e komunave se ka munguar komunikimi i mirëfilltë para këtyre masave në mes të nivelit qendror dhe lokal.

Ahmeti ka thënë se qëllimi i këtij takimi është vlerësimi i komunave për masat, efektet e tyre dhe hapat e ardhshëm në këtë drejtim.

Kryetarët e komunave janë dakorduar për rekomandimet e pushtetit lokal ndaj pushtetit qendror lidhur me situatën pandemike dhe masat e reja në këtë drejtim dhe në anën tjetër respektimin e masave nga ana e qytetarëve.

Në këtë takim kanë qenë prezent: Ardian Gjini, kryetar i Gjakovës, Xhafer Gashi, kryetar i Obiliqit, Ramiz Lladrovci, kryetar i Drenasit, Naim Ismajli, kryetar i Shtimes, Xhafer Tahiri, kryetar i Vushtrrisë, Bali Muharremaj, kryetar i Suharekës, Zenun Elelzaj, kryetar i Klinës, Besim Ilazi, kryetar i Kaçanikut,  Arber Ismajli, nënkryetar i Gjilanit, Marigona Lahu, nënkryetare e Podujevës, Memnuna Ajdini, nënkryetare e Prizrenit, etj.

Rekomandimet e komunave:

1. Qeveria të ketë prioritet vaksinimin e popullatës.

2. Komunat kërkojnë dhe rekomandojnë heqjen e orës policore.

3. Komunat rekomandojnë dhe kërkojnë që masat ndaj gastronomisë të tërhiqen dhe kërkojnë që gastronomia të zbatojë udhëzimet për distancën fizike edhe përmes tavolinave.

4. Komunat kërkojnë që të amandamentohet Ligji mbi pandeminë.

5. Kërkohet nga qeveria zbatimi i pakos së fundit të përkrahjes ekonomike dhe që të fillohet me një pako të re përkrahëse.

6. Të ketë bashkëpunim dhe bashkërendim të aktiviteteve në mes nivelit qendror dhe lokal në ruajtjen e shëndetit publik dhe ekonomik.

7. Bashkëpunimi në mes inspektoratit qendror dhe atij lokal nuk është në nivelin e duhur. Ky bashkëpunim duhet të fuqizohet në zbatim të masave në mënyrë që të ruhet shëndeti publik.