‘Kurti do të jetë në pushtet mbi 10 vjet, për Osmanin bëhen votat pa problem’

22 shkurt 11:53

Albin Kurti ka qenë në pushtet për vetëm 50 ditë, por pas fitores së 14 shkurtit pushtetin do ta mbajë së paku edhe 10 vjetët e ardhshme, mendon Agim Bahtiri, kryetari i Komunës së Mitrovicë së Jugut dhe bashkëpunëtori politik i Kurtit.

Për Bahtirin parashikimi për dominancën e Kurtit nuk është në nivel prognoze individuale, por një vrojtim i përgjithshëm.

“Të gjithë e kanë kuptuar”.

“Albin Kurti do të jetë në pushtet mbi 10 vite”, ka thënë Bahtiri për “Albanian Post”.

Bahtiri e ka bindje po ashtu se jetëgjatësia mbidekadshe në pushtet e Kurtit, do t’i shkojë në favor qytetit që ai e udhëheqë.

“Pres investime të mëdha nga qeveria Kurti pasi qeveria e kaluar edhe ato projekte që kanë qenë m’i ka ndaluar”, ka deklaruar Bahtiri, duke shprehur revoltën në raport me qeveritë e deritanishme.

Pas fitores së Vetëvendosjes, Bahtiri ka siguri se do jetë ndryshe.

“Presim ditë më të mira për Mitrovicën”, ka thënë kryetari i qytetit që mbeti i ndarë që nga lufta e fundit.

“Kurti si kryeministër t’i kthejë investimet në Mitrovicë, pasi ky qytet është në gjendje të rëndë”.

Prioritet për “qeverinë Kurti 2”, sipas Bahtirit, do të jetë edhe “ringjallja” e minierës së “Trepçës”.

“Pres që të ketë investime edhe në Trepçë. Mendoj që Kurti do ta ketë në prioritet fuqizimin e Trepçës”.

Mirëpo, përveç përkrahjes për qeverinë, ndihmë me prezencën e tij nuk do t’i jep Kurtit.

Madje, duke folur për “Albanian Post”, ka treguar se ofertën për të qenë pjesë e qeverisë së re e ka pasur, por e ka refuzuar.

“Nuk e lë Mitrovicën”, ka thënë Bahtiri që aktualisht vazhdon mandatin e dytë të tij si kryetar i komunës.

“Oferta kam pasur edhe më herët, por unë jam i përqendruar për punë të mira në Mitrovicë”, ka thënë ai.

Një nga këto punë të mira është edhe lirimi për qarkullim të veturave në urën mbi Ibër – lumi që ndan qytetin etnikisht, veç tjerash.

Bahtiri është optimist.  Ai ka thënë së “shpejt do të lirohet edhe për qarkullimin e automjeteve”.

“Është e panevojshme që mos të jetë e lirë, pasi qe sa vite nuk kemi asnjë problem ndëretnik”, ka thënë Bahtiri.

“Lirimi i urës” mund të jetë edhe motoja e fushatës së ardhshme për garën komunale në Mitrovicë. Zgjedhjet lokale mbahen këtë vit dhe Bahtiri i ka bërë të qarta ambiciet e tij për “hat trick” – do dhe një katërvjeçar në krye.

Në këtë intervistë për “Albanian Post”, Bahtiri ka folur edhe për një bashkëvendëse të tij, Vjosa Osmanin.

Partneren politike të Kurtit, Bahtiri e sheh si presidente të vendit.

Përkundër se duhen së paku 61 veta të votojnë pro Osmanit dhe në momentin e votimit të jenë minimalisht 80 deputetë që kanë marrë pjesë në procesin zgjedhës, Bahtiri nuk sheh arsye për shqetësim.

“Unë mendoj që votat për Vjosa Osmanin do të bëhen pa asnjë problem”, ka përfunduar Bahtiri.

 

Lajme të sponsorizuara

Të fundit
Mauricio Pochettino duket se ka ardhur me ide të qarta…