Kryeministri i Kosovës, Albin Kurti, ka përkujtuar “Epopenë e Dukagjinit”  me rastin e 26-vjetorit të saj.

Ai ka vlerësuar se bashkë me guximin e familjes Haradinaj, “Epopeja e Dukagjinit” kishte dëshmuar vendosmërinë e popullit për çlirim.

“Kushtrimi i lirisë dhe lufta çlirimtare në Dukagjin nisi më 24 mars 1998. Qëndresa në Gllogjan i dha Serbisë mesazhin e fuqishëm se kulla nuk gjunjëzohet, se Kosova nuk nënshtrohet. Sot kujtojmë dëshmorët e Epopesë së Dukagjinit, Gazmend Mehmetaj, Himë Haradinaj dhe Agron Mehmetaj. Sakrificën e tyre e nderojmë çdo ditë me respektin më të lartë”,  ka shkruar Kurti në “Facebook”.

Më tutje, Kurti ka thënë se “duke kujtuar Ushtrinë Çlirimtare të Kosovës, po e zhvillojmë Forcën e Sigurisë së Kosovës”.

“26 vjet më vonë, ushtrinë e shtetit e kemi më të fuqishme e më të pajisur, më të përgatitur e më të madhe se asnjëherë më parë. Krahas rritjes së buxhetit, shtimit të investimeve në armatim, sivjet ushtrisë sonë do t’i bashkohen edhe 600 rekrutë të rinj”, ka shkruar Kurti.