Lideri i Lëvizjes Vetëvendosje (LV), Albin Kurti, ka uruar besimtarët e krishterë me rastin e kremtimit të Pashkëve.

Ai ka thënë se festat tradicionale të bashkësive tona, të cilat kahmoti i kemi festuar bashkë, na dëshmojnë se dashuria dhe vëllazërimi mes njerëzve jo vetëm që është i mundshëm, por është vetë qëllimësia e njerëzimit.

“Për ne shqiptarët kjo aksiomë e barazisë është mirëkuptuar historikisht si vëllazëri ndërfetare. Në këtë kuptim vëllazëria fetare është bekim për shqiptarët dhe bekim i shqiptarëve për njërin-tjetrin nën dritën e vëllazërisë”, ka shkruar Kurti në llogarinë e vet në “Facebook”.

Postimi i plotë i tij:

Urime të gjithë besimtarëve të krishterë që kremtojnë sot Pashkën!

Pashka është festë e ngarkuar me domethënien e jetës e cila nuk përfundon, por forcohet, kur jepet për të shpëtuar të tjerët.

Pra, është një mesazh altruist, nga i cili mund të nxirren mësime të vyeshme në një kohë kur cinizmi e nihilizmi përpiqen të bëhen dominantë.

Festat tradicionale të bashkësive tona, të cilat kahmoti i kemi festuar bashkë, na dëshmojnë se dashuria dhe vëllazërimi mes njerëzve jo vetëm që është i mundshëm, por është vetë qëllimësia e njerëzimit.

Besimi i fortë se të gjithë jemi krijuar të barabartë, përbën bazën e qëndrimit se pabarazia e shtypja janë të padrejta.

Për ne shqiptarët kjo aksiomë e barazisë është mirëkuptuar historikisht si vëllazëri ndërfetare.

Në këtë kuptim vëllazëria fetare është bekim për shqiptarët dhe bekim i shqiptarëve për njërin-tjetrin nën dritën e vëllazërisë.

Qofshi të lumtur e të gëzuar në këtë ditë feste!

Urime për Pashkën, të gjithë besimtarëve!