Në Gjakovë po vijon procesi i reformimit dhe modernizimit të shërbimeve shëndetësore, me fokus të veçantë në përmirësimin e qasjes së qytetarëve, rritjen e cilësisë së shërbimeve dhe përmirësimin e infrastrukturës në nivelin primar. Në krye të këtij procesi qëndron drejtori i institucioneve shëndetësore në komunë, Lulzim Goqi, i cili ka ndërmarrë një sërë masash organizative, strukturore dhe investuese me qëllim rritjen e efikasitetit të sistemit shëndetësor.

Sipas ndryshimeve të fundit, është bërë riorganizimi i orareve të punës, shpërndarja më e mirë e stafit mjekësor nëpër Qendrat e Mjekësisë Familjare, si dhe forcimi i shërbimeve për kujdesin parësor. Këto masa synojnë të zvogëlojnë pritjet e qytetarëve dhe të sigurojnë shërbim më të shpejtë dhe më të qasshëm.

Një vëmendje e veçantë po i kushtohet edhe përmirësimit të infrastrukturës shëndetësore, përmes renovimeve në objektet ekzistuese, furnizimit me pajisje mjekësore dhe krijimit të kushteve më të mira për pacientët dhe stafin shëndetësor. Po ashtu, theks i veçantë është vendosur edhe në digjitalizimin e disa proceseve administrative dhe në përmirësimin e kushteve të punës për personelin shëndetësor, duke synuar rritjen e motivimit dhe performancës së stafit. Nga institucionet lokale theksohet se reformat janë pjesë e një vizioni afatgjatë për një sistem shëndetësor më funksional, më transparent dhe më afër qytetarëve të komunës së Gjakova. Procesi i reformimit pritet të vazhdojë edhe në muajt në vijim, me hapa të tjerë që synojnë fuqizimin e shërbimeve shëndetësore dhe modernizimin e mëtejmë të infrastrukturës.