Lutfi Haziri: Le ta gjejmë një autoritet për president

26 nëntor 08:16

Nënkryetari i LDK-së, Lutfi Haziri, ka folur edhe për raportet që ka ky subjekt me u.d e presidentit Vjosa Osmani.

Haziri ka shtuar se pakënaqësia me vendimin e Këshillit të Përgjithshëm dhe të lidershipit të LDK-së është bërë nga vetë ajo. Sipas tij, Osmani nuk ka dashur të vazhdojë në mënyrën e njëjtë dhe e ka bërë publike.

“Unë më shumë e shoh si një iniciativë politike e cila mund ta çojë drejt një rezultati të caktuar. Pritjet e mia kanë qenë krejt ndryshe. LDK-ja për këto 20 vjet pas luftës i ka nxjerrë 12 parti politike dhe iniciativa që kanë dalë nga pakënaqësia”, ka thënë ai, duke potencuar se nuk duhet lejuar që këto gabime të ndodhin.

Ai ka thënë se LDK-ja do të ketë dhimbje politike nga largimi i Vjosa Osmanit.

“Është investuar së paku prej vitit 2007, në momentin kur ka hyrë në zyrë të presidentit si këshilltare, pastaj është avancuar. Edhe Vjosa do të ndiejë mungesën e partisë që e ka familje. Kush ka dalë prej LDK-së, shihet tash ku është. Ende po e shoh që ka mundësi të riparohet ky raport”, ka thënë ai.

LDK-ja nuk është e interesuar të shkaktojë vonesa dhe shkarje që çojnë në jostabilitet, ka thënë nënkryetari LDK-së, Lutfi Haziri, në KTV.

“Sa më shpejt, edhe më drejtë e më qartë me zbardhë agjendën dhe të prodhojë stabilitet politik. Nëse e gjejmë një emër për president prej partive politike atëherë e votojmë, nëse s’bën i partive politike atëherë a bën me qenë jashtëpartiak, një autoritet. Ka shumë emra të mirë në Kosovë”, ka thënë Haziri.

Ai ka theksuar se nuk ka emra konkretë për presidentin.

“LDK-ja nuk ka diskutuar as për emrat e vet as për emra të tjerë. Ne jemi sjellë në këtë proces me më shumë kod moral sepse sa ka qenë z. Thaçi në zyrë. Kemi dashur ta respektojmë autoritetin e presidentit. Ende nuk kemi biseduar për emër, por po shihet se disponimi i partive politike është për emra brenda partiakë për momentin. Nëse partitë tërhiqen nga kandidaturat partiake, LDK-ja e mirëpret. Neve nuk na pengon”, ka thënë Haziri.

Sipas tij, nëse nuk zgjidhet çështja e presidentit atëherë shkohet në zgjedhje.

“Por a prodhojnë zgjedhjet stabilitet në të ardhmen. A prodhohet prapë mundësia që pas zgjedhjeve Kuvendi, përveç ekzekutivit, me e zgjedhë edhe presidentin. Sepse ju e dini që nëse për 40 ditë nuk mbërrin me e zgjedhë presidentin prapë shpërndahet parlamenti”, është shprehur Haziri.

 

Lajme të sponsorizuara

Të fundit
Motra e vetme e gjeneralit të Ushtrisë Çlirimtare të Kosovës,…