Maqedonia e Veriut planifikon të vaksinojë 20 për qind të popullsisë kundër gripit sezonal

09 gusht 2020 | 17:26

Ministria e Shëndetësisë e Maqedonisë së Veriut ka njoftuar se ka marrë ftesë nga Aleanca globale për vaksina dhe imunizim si dhe nga Organizata Botërore e Shëndetësisë (OBSh), që t’i bashkohen iniciativës për sigurimin e vaksinës kundër koronavirusit të ri. Po ashtu, në vjeshtë, autoritetet po përgatiten të nisin një program të vaksinimit të 20 për qind të popullatës, kundër gripit sezonal.

OBSh-ja ka nisur një iniciativë përmes skemës së quajtur “COVAX”, ku shtetet pjesëmarrëse në të, do të kenë qasje më të lehtë kur të zbulohet vaksina eventuale kundër Covid-19, sëmundjes që e shkakton koronavirusi i ri. “‘COVAX’ mekanizmi (qasja globale në vaksinat kundër Covid-19) pritet të rezultojë në zbulimin e një vaksine dhe vendosjen e pandemisë në kontroll në një afat sa më të shkurtër kohor.

Gjatë periudhës së kaluar kemi pas disa mbledhje, në të cilat janë diskutuar më shumë detaje rreth furnizimit, sasive dhe mënyrës së shpërndarjes të vaksinave”, ka njoftuar  Ministria e Shëndetësisë së Maqedonisë së Veriut. Ndërsa drejtori i Qendrës për shëndet publik në Maqedoninë e Veriut, Aleksandër Stojanov, i cili është dhe anëtar i Komisionit për sëmundje ngjitëse, në një intervistë për “Radion Evropa e Lirë” ka theksuar se vaksina do të këtë, por është shumë herët të thuhet se cila është sasia me të cilën do të furnizohet Maqedonia e Veriut si shtet. “Maqedonia e Veriut është vendosur në listën e Bashkimit Evropian për marrjen e vaksinave kundër koronavirusit.

Kur do të furnizohemi dhe me çfarë sasie, nuk mund të themi asgjë në këtë drejtim”, ka thënë ai. Autoritetet shëndetësore kanë paralajmëruar se gjatë stinës së vjeshtës pritet të vaksinohen rreth 20 për qind e popullsisë kundër gripit sezonal. Ky vaksinimin, që do të jetë pa pagesë, ka për qëllim të evitojë përkeqësimin e situatës shëndetësore, që mund të ndodhë me paraqitjen e gripit sezonal, në kohën kur vendi po përballet edhe me pandeminë e koronavirusit.

 

 

Lajme të sponsorizuara

Të fundit
Në 22 vjetorin e rënies për lirinë e Kosovës të…