Ministri në detyrë i Ministrisë së Kulturës, Rinisë dhe Sportit (MKRS), Kujtim Gashi, i ka dërguar një telegram ngushëllimi familjes Kraja me rastin e vdekjes së regjisores Arzana Kraja.

Në këtë telegram ngushëllimi është thënë se vdekja e Arzanës është humbje e madhe për kulturën e shtetit tonë.

“Ndarja e hershme e Arzana Krajës është humbje e rëndë jo vetëm për ju, familjen dhe miqtë, por është humbje dhe do të jetë mungesë e madhe për artdashësit dhe kulturën e Kosovës”, është thënë në telegramin e ngushëllimit të ministrit Gashi.

Telegram ngushëllimi i ministrit Kujtim Gashi me rastin e vdekjes së regjisores Arzana Kraja:

E nderuara familja Kraja,

Lajmin për vdekjen e parakohshme e të dashurës suaj, Arzanës, regjisores tonë të mirënjohur, e morëm me pikëllim të madh.

Arzana u nda nga kjo jetë në moshë të re, por veprat që la pas janë të shumta dhe me vlerë. Krijimtaria dhe produktiviteti i saj do të mbetet i paharruar ndër ne. Zelli me të cilin Arzana është angazhuar dhe kontributin që ajo ka dhënë në fushën e kinematografisë e ka sjellë artin në Kosovë në një dimension tjetër.

Me kontributin e saj, Arzana e ka fituar respektin e të gjithëve që e kanë njohur, sidomos atyre në botën e artit e të kulturës. Me punën e saj ka bërë që të ajo të jetë e vlerësuar dhe që ka vënë në lëvizje dhe ka nxitur të gjithë përreth saj që të punojnë sa më me vullnet. Me entuziazmin e saj, Arzana do të na sillte edhe vepra tjera përplot vlera por na iku nga kjo jetë para kohe.

Ndarja e hershme e Arzana Krajës është humbje e rëndë jo vetëm për ju, familjen dhe miqtë, por është humbje dhe do të jetë mungesë e madhe për artdashësit dhe kulturën e Kosovës.

Ne e kujtojmë me pietet dhe respekt angazhimin dhe kontributin e saj të çmuar dhënë për kulturën e Kosovës.

Ngushëllime familjes, miqve dhe dashamirëve të Arzana Krajës.

Sinqerisht,

Kujtim Gashi
Ministër i Kulturës, Rinisë dhe Sportit