Ministri i Shëndetësisë, Rifat Latifi, ka folur të enjten për procesin e vaksinimit kundër Covid-19.

Ai ka thënë se angazhimi i komunave në këtë aspekt do të ketë efekt më të madh në përmirësimin e këtij procesi, sepse siç tha ai, “Covid-19 është prezent dhe nuk ka kaluar”.

Në takimin me drejtorët e Drejtorive Komunale të Shëndetësisë dhe Mirëqenies Sociale, të organizuar nga Kolegjiumi i drejtorëve të Shëndetësisë së komunave, ku temë diskutimi ishte situata në sektorin e shëndetësisë në komuna, Latifi ka theksuar rëndësinë e Kujdesit Parësor Shëndetësor dhe bashkëpunimin dhe ndërlidhjen midis nivelit qendror dhe lokal.

Ai ka thënë se në Ministrinë e Shëndetësisë po punohet në shtatë shtylla, të cilat sipas tij, kanë të bëjnë me transformimin e sektorit të shëndetësisë, me qëllim përmirësimin e cilësisë së shërbimeve shëndetësore dhe i cili sistem ka në qendër të vëmendjes ka pacientin.

Duke përmendur rëndësinë e ligjeve të cilat janë në procedura të hartimit dhe shqyrtimit, ministri Latifi ka thënë se në këtë aspekt është duke u punuar fuqishëm që të përmbushet agjenda legjislative dhe të bëhet edhe Ligji për transplantim të organeve.

Theks të veçantë, ministri Latifi, vuri edhe tek funksionimi i Telemjekësisë në nivelin lokal, ku sipas tij, ky shërbim ka hyrë në funksion që nga viti 2002, ndërsa është e nevojshme të shtrihet në të gjitha qendrat rajonale shëndetësore të vendit.

Ndërkaq, drejtorët e Drejtorive komunale të Shëndetësisë dhe Mirëqenies Sociale, u zotuan për bashkëpunim me nivelin qendror, duke përmendur gjithashtu edhe sfidat edhe problemet me të cilat ata po ballafaqohen, përfshirë edhe resurset humane të kufizuara.