Ministri i Tregtisë dhe Industrisë, Vesel Krasniqi, ka thënë se disa pika të reciprocitetit që janë hequr nga qeveria aktuale ka ardhur si rezultat i kërkesës së miqve ndërkombëtarë dhe jo për shkak të kërkesave të Beogradit, duke shtuar se ka kaluar koha kur Gjuriqi dhe shteti serb mund të urdhërojë Kosovën.

Ai ka thënë se me këtë veprim, Kosova i ka hapur rrugë dialogut dhe tash kërkohet nga Serbia që të ndalë fushatën për ç’njohje.

Përkundër kësaj, Krasniqi ka siguruar qytetarët e Kosovës se në Kosovë më nuk mund të futën produkte që nuk respektojnë emërtimet kushtetuese.

“I siguroj qytetarët se në Kosovë nuk mund të futën produkte Kosovo e Metohi. Nëse dikush nuk e zbaton këtë vendim, do të japin përgjegjesi”, ka thënë ai për RTV 21.

Më tutje, ai ka thënë se Kosova ka shumë produkte më cilësore se sa që vijnë nga Serbia, është fjala për shumë artikuj ushqimor.

Ai ka thënë se Kosova është për një ekonomi të hapur duke synuar kështu tregjet evropiane dhe botërore.

Krasniqi ka thënë se qeveria Kurti i ka bërë dëmë vendit kur ka pranuar testet nga Serbia si dhe ka lejuar mjekët serb që të vijnë në Kosovë në kohën e pandemisë, duke shtuar se Kosova ka shumë mjekë që mund t’i shërbejnë qytetarëve të Kosovës anëkend vendit.

Ministri i Tregtisë dhe Industrisë është zotuar se do t’u qëndrojë afër prodhuesve vendorë, ndërmarrjeve të vogla dhe të mesme në mandatin e tij sepse, kjo thotë se është e vetmja forme për të rritur ekonominë vendore.