Ndonëse mësimi në distancë, për shkak të përhapjes së pandemisë, ende është duke vazhduar, ministrja e Arsimit, Shkencës, Teknologjisë dhe Inovacionit, Hykmete Bajrami, thotë se ashtu siç do të mbahet testi i maturës, do të mbahet edhe testi i arritshmërisë për nxënësit e klasave të nënta.

Bajrami në një intervistë për KosovaPress, derisa e konsideron të suksesshëm projektin për mësimin në distancë, thotë se ky vit shkollor do të shtyhet për ditët e humbura për shkak të mbylljes së shkollave për arsye të masave kundër përhapjes së pandemisë COVID-19.

“Mund të themi se është një projekt i cili mund të quhet i suksesshëm dhe konsiderojmë se deri në këtë pikë ne kemi arritur objektivat të cilat i kemi vënë vetes si Ministri e Arsimit në bashkëpunim me të gjitha drejtoritë komunale në gjithë territorin e Kosovës. […] Ne kemi pasur një shkëputje prej disa ditëve për shkak se më 11 mars Qeveria e Republikës së Kosovës mori vendimin që nga 11 marsi të bëhet mbyllja e përkohshme e mësimit, domethënë ndërprerja e mësimit në shkolla. Më 18 mars ne kemi filluar video-xhirimet, ndërsa transmetimi ka filluar më 23 mars. Është kjo periudhë që e kemi humbur. Ne, në fakt, për klasat 1 deri 9 kemi prodhuar videomateriale sipas kurrikulës dhe planprogramit. Janë përpunuar të gjitha ato njësi të cilat do të transmetohen. Përveç ditëve të humbura, viti shkollor në distancë duhet të përfundojë sipas kalendarit të paraparë edhe në udhëzimin administrativ, por edhe në vendimet e MAShTI-t. Pra, mund të shtyhet vetëm për ditët e humbura, përndryshe do të përfundojë me kohë”, tha ai.

Ministrja e Arsimit thotë se gjatë këtyre ditëve do të merret vendimi për testin e arritshmërisë, të cilin e sheh të nevojshëm për orientimin e nxënësve nëpër shkolla. “Brenda kësaj jave ose gjatë javës tjetër do të merret vendim edhe për testin e arritshmërisë. Neve na duhet një vlerësim formal nga ekspertë dhe zyrtarë të Ministrisë së Arsimit për të parë se testi a duhet të mbahet e ne vlerësime të tilla nuk kemi. […] Testi i arritshmërisë, para së gjithash, e bën njëfarëlloj orientimi të nxënësve nëpër shkolla sepse pikërisht në bazë të arritjes që ata kanë, orientohen mandej nëpër shkolla të ndryshme, qoftë te gjimnazet sepse ju e dini se shikohen pikët e arritjes nëpër lëndë të ndryshme dhe varësisht prej tyre mund të regjistrohet nxënësi diku. Kështu që është i nevojshëm të mbahet. Ne do të bëjmë përpjekje që brenda javës t’i njoftojmë nxënësit dhe besoj se testi do të mbahet. Nuk ka vendim që ky test të mos zhvillohet këtë vit. Ndërsa, për vitet e tjera MASHTI do të bëjë vlerësim për të gjitha testet për të parë që me të vërtetë këto teste a kanë vlerë të shtuar në proces të sistemit arsimor”, ka thënë ajo.

E para e Arsimit në vend ka dhënë edhe hollësi për mbarëvajtjen e testit të maturës i cili është planifikuar të mbahet në javën e parë të muajit korrik.

“Testi i maturës do jetë më i kompresuar. Kemi vendosur që prej 200 pyetjeve sa kanë qenë në vitet e tjera, të jenë vetëm 100 pyetje, të mos zhvillohet në dy raunde, por vetëm një raund. Të zhvillohet në tërë territorin e Republikës së Kosovës në të njëjtën datë dhe në të njëjtën ditë. Do të përmbajë pyetje nga gjuha amtare, gjuha angleze, matematika dhe një lëndë zgjedhore që e zgjedhin nxënësit. Nuk do të ketë asnjë pyetje nga përmbajtja e mësimeve që janë zhvilluar në distancë. […] Do të jetë nëpër shkolla. Mund t’i shfrytëzojmë edhe hapësirat e universiteteve. Do t’i respektojmë në përpikëri rekomandimet e IKShP-së”, ka thënë Bajrami.

Ajo e pranon se mësimi në distancë nuk e zëvendëson atë në shkolla, por thotë se përmes udhëzimit për vlerësim nuk do të ketë telashe për mënyrën e vlerësimit.

Për shkak të ndërprerjes së mësimit në Kosovë, me qëllim të parandalimit të përhapjes së pandemisë COVID19, që nga 23 marsi i këtij viti ka filluar mësimi online. Kësaj radhe nxënësit po i ndjekin mësimet nga televizori dhe jo siç është mësuar ta dëgjojë mësuesen e saj në shkollë.