Ish-nënkryetari i OVL-UÇK-së, Nasim Haradinaj, ka kritikuar kryeministrin në detyrë, Albin Kurti, për letrën e dërguar në Hagë duke theksuar se ka tentuar të zhvendosë vëmendjen nga rasti i Astrit Deharit, duke e përdorur situatën për të “larë sy e faqe” dhe jo për të dhënë përgjigje reale.

“Ka datën e vitit 2022, por sot datën e Astritit Deharit prandaj sot ke më tepër me zhvendos vëmendjen andej ku sot është dashur të na tregoj për tetë vjet premtime, të paktën vrasjen e Astrit Deharit ta zbulojë, për kundër kësaj jo vetëm që kemi parë ndonjë zbulim… Më tepër e ka bërë zhvendosjen, sa për të larë sy e faqe, nuk mund të quhet punim në heshtje do të thotë ky priti tri vjet këtë ditë, priti zgjedhje, priti ditën që ta zhvendos vëmendjen aty ku ai është dashur që sot të japë përgjegjësi”, ka thënë Haradinaj.

Komentet e tij erdhën pas deklaratës së Kurtit, i cili tha se nuk ka arsye ligjore apo morale që ish-udhëheqësit e UÇK-së të mbahen në paraburgim nga Gjykata Speciale në Hagë.

Kurti publikoi gjithashtu letrën që i kishte dërguar kryetares së Dhomave të Specializuara, Ekaterina Trendafilova, duke kërkuar lirimin e tyre në vitin 2022.