Në Kuvendin e Kosovës është mbajtur takimi për themelimin e Këshillit për Zhvillim të Qëndrueshëm, në të cilin të pranishëm ishin kryetarë të komisioneve parlamentare dhe deputetë, përfaqësues nga kabineti i kryetarit, Sekretari i Kuvendit, udhëheqës të Agjencive Zhvillimore të Kombeve të Bashkuara në Kosove, përfaqësues nga Zyra e Kryeministrit, Asociacioni i Komunave të Kosovës, Agjencia e Statistikave, si dhe përfaqësues të institucioneve të tjera vendore dhe ndërkombëtare.

Hapjen e takimit e bëri kryetarja e këtij këshilli, Besa Baftiu, njëkohësisht kryetare e Komisionit për Shëndetësi, Punë dhe Mirëqenie Sociale, e cila ka falënderuar të pranishmit për mbështetjen e tyre ndaj kësaj nisme.

Kryetarja Baftiu ka thënë se qëllimi kryesor i Këshillit është të bashkojë parlamentarët dhe përfaqësuesit e tjerë institucionalë, organizatat ndërkombëtare dhe institutet – organizatat e shoqërisë civile, për t’u koordinuar në një aksion të përbashkët për arritjen e 17 objektivave zhvillimore, të njohura si Objektivat për Zhvillim të Qëndrueshëm (OZhQ-të) apo Agjenda 2030.

Në vazhdim fjalim ka mbajtur edhe Ulrika Richardson, koordinatore për Zhvillim e KB-ve dhe Përfaqësuese Rezidente e UNDP-së në Kosovë, e cila ka shprehur gatishmërinë për bashkëpunim rreth këtyre objektivave.

Me hapjen e diskutimit pati hapësirë për të pranishmit që të shprehin qëndrimet e tyre lidhur me këtë strukturë parlamentare.

Me këtë rast u theksua mbështetja absolute për aktin themelues të Këshillit, i cili do të funksionojë si një mekanizëm ndërinstitucional në kuadër të Kuvendit, dhe do të jetë në shërbim të koordinimit sa më të mirë të proceseve drejt arritjes së zhvillimit të qëndrueshëm në Kosovë.

Pas përfundimit të takimit, është bërë inaugurimi i instalacionit të OZhQ-ve në oborrin e Kuvendit, nga Ulrika Richardson dhe Besa Baftiu.

Kryetarja Baftiu ka thënë se ky instalacion parashihet të qëndrojë në oborr të Kuvendit deri në vitin 2030, pikërisht deri atëherë kur parashihet edhe të përfundojë misioni i këtij Këshilli.

/Epoka e re/​