Nisma në Gjilan: Lutë, po të pret një opozitë më e fortë se pozita jote!

30 prill 2018 | 19:02

Zyrtarët e Nismës Socialdemokrate në Gjilan kanë paralajmëruar kryetarin e kësaj komune, Lutfi Haziri, se në këtë mandat do të përballet me një opozitë shumë të fuqishme.

Asamblistja e kësaj partie, njëherësh edhe nënkryetare e degës në Gjilan, Anila Tusha-Kastrati nëpërmjet një postimi në llogarinë e saj në “Facebook” ka thënë se kaosi i gjithë këtyre muajve kolaps në Komunën e Gjilanit, sot u kurorëzua me dështim.

Ajo madje ka thënë se në mesin e drejtorëve që janë emëruar sot ka edhe të atillë që kanë aktakuzë për keqpërdorim të detyrës.

“Të gjithë i pamë emrat e drejtorëve të rinj të Lutfi Hazirit, që dalin nga koalicioni që u lidh të shtunën në mes tij dhe shumë partive tjera, por pa numra të mjaftueshëm për qeverisje. Ky koalicion jo vetëm që është i dobët, por në mesin e drejtorëve ka edhe njerëz me aktakuzë për keqpërdorime”, ka shkruar ajo.

Kastrati-Tusha është shprehur se Nisma Socialdemokrate asnjëherë nuk do të bëhet pjesë e një qeverisjeje pazaresh dhe nën presion.

“Lutë, po të pret një opozitë më e fortë se pozita jote!”, ka paralajmëruar ajo.

Ndërkohë, sot kryetari i Gjilanit, Lutfi Haziri, pas nënshkrimit të marrëveshjes për bashkëqeverisje LDK-AAK-AKR, ka bërë publike emërimet e larta në kabinetin e tij.

Nënkryetar është emëruar Arbër Ismajli (LDK), ndërkaq shef i Kabinetit për mandatin e ri, Faton Bislimi (LDK).

Drejtorinë për Kadastër, Gjeodezi dhe Pronë do ta udhëheqë Sadudin Berisha (LDK), atë të Bujqësisë, Ramiz Ramadani (LDK), resorin e Kulturës, Rinisë dhe Sportit, Shpresë Hajdari (LDK), Drejtorinë e Inspeksionit, Nevzad Rushiti (LDK), të Buxhetit dhe Financave, Zijadin Maliqi (LDK), përderisa drejtor në Shërbimet Publike është emëruar Naser Korça (LDK). Bekim Bajrami është emëruar drejtor në Urbanizëm, që sipas Hazirit, ka ardhur si propozim i organizatave të biznesit, ndërkohë Drejtorinë për Zhvillim Ekonomik do ta udhëheq Valbona Tahiri, e cila vjen nga shoqëria civile.

Drejtor i Administratës së Përgjithshme është emëruar Bardhyl Syla (LDK), i Arsimit, Nazim Gagica (AAK), i Shëndetësisë dhe Mirëqenies Sociale, Selami Xhemajli (AAK), përderisa i asaj për Mbrojtje dhe Shpëtim, Sami Spahiu (AKR).

Lajme të sponsorizuara

Të fundit
Një eveniment special dhe domethënës do të mbahet nesër më…