OBSh-ja lëshon alarmin, rritet numri i rasteve të fruthit

14 gusht 15:50

Fruthi është duke u përhapur në mbarë botën, ku veçanërisht e prekur është Afrika. Por edhe në Evropë përhapja e kësaj sëmundjeje po jep shkas për shqetësim, ndaj Organizata Botërore e Shëndetësisë (OBSh) përballë kësaj gjendje, ka kërkuar më shumë vaksinime.

Në gjysmën e parë të vitit 2019 në nivel global është regjistruar numri më i madh i të prekurve nga fruthi në të njëjtën periudhë krahasuar me vitin 2006.

Deri në fund të korrikut janë regjistruar në 182 vende, sipas shifrave paraprake, gati 365 mijë raste fruthi.

“Kjo shifër flet për tri herë më shumë të prekur sesa në të njëjtën periudhë të vitit 2018 dhe më shumë se përgjatë gjithë vitit të kaluar. Ata që udhëtojnë duhet të tregojnë kujdes dhe të verifikojnë nëse vaksinimi i tyre është i efektshëm,” ka njoftuar OBSh-ja me seli në Gjenevë.

Nga mosha gjashtë muajsh, të gjithë duhet të vaksinohen të paktën 15 ditë përpara se të udhëtojnë në një nga rajonet e prekura. Vlerësimet aktuale për përhapjen e kësaj sëmundjeje u referohen të dhënave nga viti 2017.

Në atë kohë ishin 6.7 milionë njerëz të sëmurë nga fruthi dhe rreth 110.000 të vdekur. Fruthi është një sëmundje ngjitëse, që prek kryesisht fëmijët dhe nga ku të mbijetuarit mund të pësojnë dëmtime të trurit ose mund të mbeten të verbër apo të shurdhër.

Lajme të sponsorizuara

Të fundit
Qindra banorë janë evakuuar dhe kryeministri grek ka anuluar pushimet…