Papa Françesku kërkon zgjidhje për Lindjen e Mesme dhe refugjatët

25 dhjetor 2017 | 13:42

Papa Françesku e ka shfrytëzuar mesazhin e tij për Krishtlindje për të bërë thirrje që të zgjidhet konflikti izralelito-palestinez, pasi presidenti amerikan, Donald Trump ngriti tensionet me njohjen e Jerusalemit, kryeqytet të Izraelit.

Papa ka folur për konfliktin në Lindjen e Mesme derisa i është adresuar çështjeve botërore vetëm katër ditë pasi më shumë se 120 shtete e mbështetën rezolutën e Kombeve të Bashkuara, e cila e kundërshton vendimin e SHBA-së për Jerusalemin.

“Le të lutemi që të triumfojë vullneti për dialog në mes të palëve dhe të arrihet një zgjidhje përmes negociatave, ashtu që të dy vendet të jetojnë së bashku në një ambient me kufij të njohur ndërkombëtarisht”, ka thënë ai duke iu referuar izraelitëve dhe palestinezëve, raporton “Rel”.

Kjo është hera e dytë që Papa ka folur publikisht për këtë konflikt. Ai po ashtu ka përmendur edhe fëmijët që ka parë gjatë një vizite në Mianmar dhe Bangladesh, duke thënë se ka parë Jezusin në secilin fëmijë dhe ka bërë thirrje për mbrojtje të dinjitetshme të atij grupi në rajon.

Më shumë se 600. 000 myslimanë rohingya janë larguar nga Mianmari i banuar nga budistët për në Bangladesh gjatë muajve të fundit.

Papa kishte pasur një qasje diplomatike gjatë vizitës së tij në këtë rajon, duke mënjanuar termin “rohingya” derisa ishte në Mianmar, pasi ky vend nuk i njeh ata si grup minoritar.

Sidoqoftë ai u është drejtuar refugjatëve si “rohingya” kur ka arritur në Bangladesh.

Ndër të tjera ai ka përmendur edhe fëmijët e pafajshëm në Siri, Irak dhe Jemen, duke shtuar se ata persona jetojnë në kushte shumë të vështira të jetës.

Gjatë mesazhit të tij, Papa Françesku ka treguar mbështetje shumë të fortë edhe për imigrantët.

Lajme të sponsorizuara

Të fundit
Qytetarët e Kosovës mendojnë se tri arritjet më të mëdha…