PDK-ja: Vendimi i qeverisë Kurti për Telekomin, antikushtetues dhe kundër sektorit privat, synon kthimin në ekonomi komuniste

08 prill 2020 | 13:00

Partia Demokratike e Kosovës (PDK) ka dënuar veprimet siç ka thënë të dëmshme të qeverisë së shkarkuar Kurti në raport me Kushtetutën dhe ligjet e Kosovës.

Sipas kësaj partie, pas një varg shkeljesh kushtetuese e ligjore, qeveria Kurti  ka aprovuar edhe një vendim antikushtetues e ligjor, duke përjashtuar shërbimet telekomunikuese që ofron Telekomi i Kosovës nga fushëveprimi i Ligjit për Prokurimin Publik.

PDK-ja ka theksuar se me këtë vendim skandaloz, qeveria ka bërë një varg shkeljesh dhe ka goditur rëndë vlerat elementare të një shoqërie demokratike, duke sulmuar drejtpërdrejtë sektorin privat dhe konkurrencën e lirë.

“Ky akt gjithashtu përbën një kthim prapa drejt një modeli të ekonomisë shtetërore të centralizuar komuniste që gjatë shekullit të kaluar dështoi kudo ku është aplikuar në 85 vende dhe në pesë kontinente. Kosova është përcaktuar, edhe në Kushtetutë, për të ndërtuar një ekonomi liberale, bazuar mbi iniciativën e pronën private, mbi tregtinë e lirë e sundimin e ligjit”.

“Po ashtu, ky vendim është në kundërshtim me përcaktimin që ka zgjedhur Kosova për tu integruar në familjen evropiane dhe frymën mbështetëse të popullit të Kosovës si ndër më pro-evropianët. Integrimi evropian kërkon mes të tjerave përmbushjen e kriterit ekonomik, që nënkupton ndërtimin e një ekonomie tregu funksionale që ka aftësi për ndërvepruar me presionet e konkurrencës së tregut të brendshëm të BE-së”, është thënë në reagimin e PDK-së.

Më tutje, Partia Demokratike e Kosovës (PDK) ka gjykuar se vendimi i qeverisë është i papranueshëm, i dëmshëm dhe i rrezikshëm për të ardhmen e demokracisë dhe ekonomisë së vendit tonë si dhe për procesin e integrimit Evropian.

“Prandaj, u bëjmë thirrje të gjitha organeve kompetente të shtetit tonë, që ta rrëzojnë këtë vendim duke angazhuar të gjitha mekanizmat juridikë mbi të cilët garantohen vlerat kushtetuese, demokratike dhe ekonomike të shtetit tonë. Po ashtu i bëjmë thirrje Bashkimit Evropian dhe ambasadave të vendeve partnere që ta denoncojnë këtë vendim të dhe bëjnë presion për anulimin e tij”

“Së fundmi, i bëjmë thirrje edhe shoqërisë civile e mbarë opinionit publik që të ngrejë zërin kundër veprimeve arbitrare të vazhdueshme të kësaj qeverie të shkarkuar e cila po e shndërron në traditë të pandalshme shkeljen e kushtetutës dhe ligjeve të vendit tonë”, është thënë në reagimin e partisë më të madhe opozitare.

Lajme të sponsorizuara

Të fundit
Kim Kardashian publikisht ka dalur në mbështetje të organizatës bamirëse…