Përfundon seanca e parë gjyqësore ndaj Salih Mustafës

15 shtator 16:54

Në Dhomat e Specializuara në Hagë, pas më shumë se pesë orësh, ka përfunduar seanca gjyqësore ndaj Salih Mustafës, ish-komandant i Ushtrisë Çlirimtare të Kosovës, që akuzohet për krime lufte.

Seanca të tjera në rastin e Mustafës pritet të mbahen më vonë gjatë këtij muaji.

Ky është gjykimi i parë që nis në Dhomat e Specializuara në Hagë, që njihen ndryshe edhe si Gjykata Speciale.

Prokurori i Specializuar, Jack Smith, gjatë fjalës hyrëse tha se përderisa rastet e tjera që do të dalin para kësaj gjykate, do të flitet për viktima të etnive të ndryshme, si shqiptarë kosovarë, serbë, romë, në rastin e Mustafës, sipas tij, të gjitha viktimat ishin bashkatdhetarët e tij, shqiptarë të Kosovës.

Sipas Prokurorisë së Specializuar “faji i vetëm” i disa viktimave ishte se ishin pjesëtarë të Lidhjes Demokratike të Kosovës.

Smithi, gjithashtu ka lavdëruar Kosovën dhe popullin e saj për krijimin e Gjykatës Speciale dhe mbështetjen e këtij institucioni.

“Kjo gjykatë flet me krenari për përkushtimin e njerëzve në Kosovë për sundimin e ligjit. Njerëzit e Kosovës kanë qenë forca lëvizëse e zyrës tonë dhe këtij institucioni”, ka thënë ai.

Prokurori i Specializuar, Smith ka thënë se krimet e luftës nuk justifikohen.

“Kundërshtarët e kësaj gjykate përdorin shprehje si ‘lufta e pastër’. Si prokuror është përtej detyrës time të ju tregoj cila është luftë e pastër, por mund të them që krimet e luftës në një anë nuk i justifikon krimet në anën tjetër”, ka thënë Smith.

Ndërsa prokurori i Zyrës së Prokurorisë së Specializuar, Cezary Michalczu, ka thënë se viktimat ishin parë si “pengesë” e udhëheqësisë së UÇK-së.

Në anën tjetër, ish-komandanti i Ushtrisë Çlirimtare të Kosovës, Salih Mustafa është deklaruat i pafajshëm për akuzat për krime lufte.

Për akuzat ndaj tij, Mustafa edhe më herët është deklaruar i pafajshëm. Por, edhe gjatë fillimit të seancën, gjykatësja e pyeti nëse ende qëndron ky deklarim i tij dhe Mustafa ka thënë: “Po, për asnjë nga pikat që mi ngarkon kjo zyre e Gestapos”, duke bërë referencë për shërbimin sekret policor në kohën e Gjermanisë naziste.

Pas përfundimit të fjalës hyrëse së Prokurorit të Specializuar, Salih Mustafa nuk është kthyer në sallën e gjykimit pasi kishte njoftuar avokatin e tij se nuk dëshiron të jetë në prezent gjatë gjykimit.

Gjykata Speciale ka bërë me dije se dy dëshmitarë në këtë proces do të dëshmojnë ndërmjet 20 dhe 28 shtatorit.

Salih Mustafa gjatë nisjes së gjykimit ndaj tij.

Lajme të sponsorizuara

Të fundit
Kryeministri Edi Rama ka reaguar pas lajmit të miratimit të…