Sot është shënuar 27-vjetori i rënies heroike të dëshmorit të kombit, Milazim Mavraj, i njohur me nofkën “Çeçeni”.

Me këtë rast, nënkryetari i Komunës së Istogut, Genc Ademaj në praninë e familjarëve të dëshmorit, zyrtarëve komunalë, përfaqësuesve të shoqatave të dala nga lufta, si dhe një numër i madh qytetarësh, ka nderuar me homazhe jetën dhe veprën e dëshmorit Milazim Mavraj – “Çeçeni”, i cili ka rënë heroikisht në rrasë të Koshares.

Po ashtu, dëshmori Milazim Mavraj është përkujtuar edhe nga kryetari i Klinës, Zenun Elezaj.

“Sot, në 27 vjetorin e rënies së heroike, së bashku me bashkëpunëtorë, veteranë të luftës, veprimtarë, familjarë dhe qytetarë, përkujtuam dëshmorin e kombit, Milazim Mavraj-‘Çeçeni’. Milazimin, të cilin e kisha djalë të dajës, e njihja shumë mirë. Ai ishte gjithmonë një atdhetar i pashoq dhe çdoherë i gatshëm të sakrifikonte për atdheun. Ai u flijua për lirinë e Kosovës më 28 prill 1999, në Kosharen heroike, ku morën pjesë dhe ranë heroikisht djemtë e vajzat më të mira të kombit, të cilët luftuan e sakrifikuan për liri dhe atdhe. Ne përulemi me nderim para veprës heroike të dëshmorëve të kombit! Lavdi e përjetshme!”, ka shkruar Elezaj në “Facebook”.

Biografia e Milazim Mavrajt:

Milazim Sadri Mavraj lindi më 28 shkurt 1966 në fshatin Saradran të Istog, në një familje me tradita të thella patriotike, ku dashuria për atdheun dhe ndjenja e sakrificës përcillej brez pas brezi. Që në rini u dallua për karakter të fortë, guxim dhe ndjenjë të lartë përgjegjësie ndaj vendit të tij.

Si shumë shqiptarë të asaj kohe, për një jetë më të mirë ai kishte shkuar në Gjermani. Por, kur Kosova u përball me luftë dhe rrezik, ai nuk qëndroi larg. Me të marrë vesh për gjendjen në atdhe, vendosi të kthehej pa hezitim për t’i dalë zot vendit të tij.

Me vete solli jo vetëm vullnetin për luftë, por edhe ndihma të shumta materiale që ishin të domosdoshme për luftëtarët e Ushtria Çlirimtare e Kosovës. Kjo tregon se ai nuk mendonte vetëm për veten, por për gjithë shokët dhe për kauzën e përbashkët.

Në luftë njihej me nofkën “Çeçeni”, një emër që lidhej me guximin dhe vendosmërinë e tij. Ai ishte luftëtar i fortë, i palodhur dhe gjithmonë në vijën e parë të frontit, duke u përballur drejtpërdrejt me armikun.

Gjatë Beteja e Koshares, një nga betejat më të ashpra dhe më vendimtare të luftës në Kosovë, Milazim Mavraj tregoi trimëri të jashtëzakonshme. Në kushte të vështira malore dhe nën zjarr të pandërprerë, ai luftoi me vendosmëri deri në fund.

Më 28 prill 1999, në Koshare, ai ra dëshmor në fushën e nderit, duke dhënë jetën për lirinë e Kosovës. Rënia e tij është një humbje e madhe për familjen dhe kombin, por edhe një dëshmi e sakrificës së madhe që u bë për çlirim.

Milazim Sadri Mavraj mbetet një figurë e respektuar dhe e kujtuar me krenari, si një luftëtar i vërtetë që la gjithçka pas për atdheun. Emri i tij jeton në kujtesën e popullit si simbol i guximit, besës dhe dashurisë për liri.