Është bërë inaugurimi i pikës së re grumbulluese për pemë të imëta në Shtanishor nga Komuna e Gjilanit, mbështetur nga TIKA Turke, me iniciativën e Shoqatës “Mjedra e Kosovës”.

Kjo pikë ofron mundësi për fermerët e Anamoravës e më gjerë që të ruajnë prodhimet e tyre.

Në ceremoni ishin kryetari i Komunës së Gjilanit, Alban Hyseni, ambasadori i Turqisë në Kosovë Sabri Tunç Angili, koordinatorja e TIKA në Kosovë, Fulya Aslan, nënkryetari i Komunës së Artanës, Bajrush Ymeri, drejtori për Bujqësi Bajram Isufi, fermerë dhe zyrtarë të tjerë.

Kryetari i Komunës së Gjilanit, Alban Hyseni, tha se kishte kënaqësinë të pret në takim ambasadorin e Turqisë në Kosovë, Sabri Tunç Angılı.

“Temë kryesore ishte ndërtimi i pikës së grumbullimit për pemë të imta, projekt i përbashkët i TIKA-s dhe Komunës së Gjilanit, me kapacitet vjetor prej 150 tonësh produkt”, tha Alban Hyseni.

I pari i komunës theksoi se ky investim vjen pas subvencionimit nga komuna të 7 hektarëve të mbjellë: 5 hektarë me mjedra (19 përfitues) dhe 2 hektarë me boronica (10 përfitues).

Kryetari Hyseni tha se me një vlerë prej 118 mijë euro, përfituesit janë mbështetur me fidanë, vazo, gjeotekstil, sistem ujitjeje me pompë dhe pajisje për spërkatje.

“Ky është një hap i rëndësishëm për zhvillimin e bujqësisë, rritjen e prodhimit vendor dhe krijimin e mundësive të reja për fermerët tanë”, tha i pari i Gjilanit.

Ambasadori i Turqisë në Kosovë, Sabri Tunç Angili, tha se investimet sikur kjo e pikës grumbulluese për pemët e imëta janë shumë të rëndësishme.

Ai falënderoi Agjencinë Turke për Bashkëpunim dhe Koordinim (TIKA) për hapjen e kësaj pike grumbulluese në kuadër të projektit “Instalimi i pikës grumbulluese për prodhuesit e pemëve të imëta në komunën e Gjilanit”.

Ambasadori Angili, falënderoi edhe kryetarin e Komunës së Gjilanit, Alban Hysenin për bashkëpunimin e shkëlqyeshëm.

Sipas tij ky projekt ka për qëllim të lehtësojë procesin e grumbullimit të prodhimeve bujqësore dhe të përkrahë drejtpërdrejt prodhuesit lokalë të pemëve të imëta, duke ndikuar pozitivisht në zhvillimin ekonomik të rajonit dhe fuqizimin e sektorit bujqësor në Gjilan.