ZOTI NË FUNDJAVË

Nuk e di

çfarë viti ishte

kur u linde ti

çfarë stine

çfarë muaji

çfarë jave

që të mos bëj

më shumë tautologji

unë orientimisht

e di vetëm një gjë

ishte fundjavë

mbase e shtunë

a e diel

dhe Zoti e kishte pushim

nuk kishte punë tjetër

dhe të krijoi ngadalë

SYTË E TU

Për sytë e tu ia vlen të shkosh,

aq sa syri sheh në hapësirë.

Dhe tjetërgjë të shikosh,

do të duket veç mugëtirë.

Për sytë e tu,

UNESCO-s do t’i shkruaj,

kërkesën t’ia lë aty,

sytë e tu t’i marr e t’i ruaj.

Se ne s’do të jemi një ditë,

e bota do të jetë përherë.

Çdo gjë mund të ketë përsëdytë,

si sytë e tu asnjëherë.

SIKUR TI

Gra, gra, gra, kjo botë ngado me gra

po sikurse ti nuk është as edhe një.

Një ditë pa ty është vetëm ditë ters,

ashtu siç tha edhe shoku Eminesk.

Gra, gra, gra, kjo botë ngado me gra

po në mes turmës njeriu e sheh një.

Ajo lajmërohet porsi një shkëndijë,

janë bashkë parajsa dhe ferri i atij.

MATEMATIKANJA

Miku im

dashurohu

por ta dish

nëse është matematikane

mund të jesh veç numër

paramendo veç një numër

një numër më shumë

në kalkulatorin

e një llogaritare gjakftohtë

thua ti s’po ndodh asgjë

dhe edhe vuajtja jote

si gjërat e tjera

bën të mblidhet

e të zbritet

me numra.

NJË AFGANE NË PRISHTINË

Një afgane e bukur

e kishte humbur rrugën

në sheshin e Prishtinës

desha t’i ndihmoj

po shqetësohesha për portretin tim

kisha drojë

se çfarë motivesh do t’i jepja

për t’i nxjerrë në qilim

një ditë kur ta punonte

pasi të kthehej

andej nga kishte ardhur