NGA GJYKATA USHTARAKE NË SARAJEVË

…fajtor pse ke thënë:

e dua Lokemadhen,

Nënëloken.

Është Nëna ime.

… pse ke puthur

në ballkonin e shtëpisë sate

në Gjilan

flamurin me shqiponjë…

… pse ke shkruar në një poezi

do ta vrasim një ditë ujkun…

… pse ke pëshpëritur

në autobusin e linjës Gjilan-Prishtinë

ata po na e pinë gjakun tonë…

… pse ke kënduar një ditë

për Shotë Galicën, Bajram Currin,

pse e ke quajtur Beogradin

xhelat.

Ke bërë krim

prandaj dënohesh me pesë vjet burgim!

(Burgu ushtarak, 13 maj 1983, Sarajevë)

QENI

Në orën e shëtisë

mes muresh deri në qiell

në vend të milicit

na ruan një qen i zi.

Është i mirë ai,

s’na urren si ata.

Dje ia ledhatova pakëz ballin,

kur u afrua afër meje

i fola:

Ne s’kemi bërë asgjë të keqe

ta dish edhe ti

vetëm pranverën tonë kërkojmë.

Më shikoi dhembshurisht,

lëvizi bishtin,

e di, e di, desh të më thoshte

si qeni i shtëpisë sime

dhe m’u hodh në gjoks.

Sot s’e pashë

as e dëgjova lehjen e tij.

Thanë

e vranë për tradhti.

Ne e nderuam

me një minutë heshtje.

(Burgu i Foçës, prill 1986)