NËNË, TI JE BARAS ME ZOTIN

Buzët mbi rrudhat tua kur i vë

Thonë se vetëm ti je baras me Zotin

Nënë mbi ty nuk di të ngre zë

Zemra më qan por unë di ta fsheh lotin

Nënë atë shifër ti që e ke

Ata numra t’i drejtoj e t’i jap

Po të kisha fuqi të shihja më të re

Ende më të re ty që të shoh prapë

Këtu dhe Zotit ia kisha prishur

I kisha ndërruar me shifrën time

Tani Perëndi ti duhet ta dish

Merri vitet e mia nga jeta ime

Buzët mbi rrudhat tua kur i vë

Thonë se vetëm ti je baras me Zotin

Nënë nuk do të ndërroja asgjë

Zemra më qan por unë di ta fsheh lotin

13.06.2022

LAMTUMIRË PSE S’MË THE

(vëllait tim Zenelit)

U mundova ta zgjat dorën

Dorën ti si nuk ma dhe

Na ndau vala si orteku borën

Lamtumirë ti pse s’më the

U mundova ta thaj lumin

E ta shter gjer në dysheme

Në fund fare e bëre gjumin

Ike pa mua shkove mbi re

E shtera lumin e thava kot

Më iku dita e më zuri terri

Prapë lumin e mbusha me lot

As hija jote nuk më erdhi

U mundova ta qaj hallin

Më le i vetëm derë më derë

Që ta hedhja nga vetja mallin

Ta puth foton në mermer

20.01.2022

SIKUR HIJA MË IKE

(për Shaip Morinën)

Sa shpejt mik ti sikur hija më ike

Hero, s’isha aty të ndez një qiri

Ike në kohën më kritike

Shkabë flamuri ishe më i miri

Thuri elegji e një mesazh e pres

Gjak derdhe në beteja lavdie

Në gjysmështizë flamurin a ta zbres

Para teje nuk zbres flamuj partie

Ike i qetë pa bujë ike dhe heshte

Kohën s’e humbje, nuk të shkonte huq

Lirinë më shumë se veten e deshe

Edhe më lart të ngrihet flamuri i kuq

08.05.2021

MBI SHTËPINË TIME

Sa herë bie dëbora e parë

Bie edhe unë në vegime

I shtrirë si çarçaf i bardhë

Që bie mbi shtëpinë time

Sa herë bie dëbora e parë

Sigurisht e sjell veriu

Çati që sa kohë jemi të ndarë

Oborrin nuk e shkel njeriu

Sa herë bie dëbora e parë

Shpirtin e mbulon ndryshku

Eh zemra sa është e vrarë

Me dëborë a fshihet myshku

09.12.2022

NXËNËSIT E MI

Më kujtohet dita e parë

Rezën e derës kur e kapa

Në dorë e mora një ditar

Derën e klasës e hapa

Zemra ime qeshi e u dogj

Me mall hyra unë në klasë

Nxënësit cicëronin sikur zogj

E shënoja orën në dërrasë

Shpirti flakë m’u pat ndez

Në ditar i shënoja datën orën

T’i lësh a ka ditë më të zezë

Ku s’arrita t’ua shtrij as dorën

Sa i madh qenka ky pikëllim

Lotët edhe shiun kur e mundin

I lë të gjithë i rrekësh mërgimit

E sheh ditarin për herën e fundit

07.03.2022