Policia e Kosovës (PK) ka njoftuar se duke u bazuar në realizimin e objektivave strategjike dhe planin e veprimit, në ruajtjen e rendit dhe sigurisë publike, si dhe parandalimin e aktiviteteve të ndryshme kriminale, ka arritur rezultate pozitive në uljen e trendit të krimit, përfshirë uljen e veprave penale si Grabitjet, Vjedhjet dhe Vjedhet e Rënda.

“Policia e Kosovës, ka përfunduar një analizë paraprake edhe pse jemi para përfundimit të vitit kalendarik, një analizë gjithëpërfshirëse i është bërë realizimit të Planit të Punës për 2020. Parametrat e matjës së krimit në përgjithësi krahasuar me periudhën e njëjtë të vitit të kaluar kanë shënuar rënie”, ka njoftuar policia, raporton “Epoka e re”.

Sipas këtij njoftimi, veprat penale për këtë periudhë kohore kanë shënuar rënie për -6.15% (nga 24 631 në 2019, në 23 114 në 2020). Po ashtu edhe rastet (veprat penale plus incidentet tjera) të inicuara nga policia, kanë shënuar rënie për -6.31%.

“Policia e Kosovës, në zbatim të detyrave të saja, në realizim të Planit të Punës, gjatë kësaj periudhe ka arrestuar 9715 të dyshuar, ose 12.71% më shumë se në të njëjtën periudhë të vitit të kaluar.

Po ashtu, numri i personave që janë dërguar në mbajtje është 3870, ose 9.87% më i lartë se në periudhën e njëjtë të vitit të kaluar”, theksohet në njoftimin e policisë.

Ndërkaq veprat penale (ato më kryesoret), kundër pasurisë, kanë shënuar një ulje të ndjeshme. “Numri i vjedhjeve ka shënuar ulje, nga 4131 në 3492 ose -15.46%; Numri i vjedhjeve të rënda ka shënuar ulje, nga 3421 në 3030 ose -11.42 %; Numri i rasteve grabitje ka shënuar ulje nga 147 në 127 ose -13.60%”, ka njoftuar Policia e Kosovës.

Policia e Kosovës edhe përkundër uljes së trendit të krimit, ka bërë me dije se vazhdon të mbetet e përkushtuar në zbardhjen e ç’do rasti, në identifikimin e ç’do personi të dyshuar, me qëllim për të zbatuar synimet e saja, për të ofruar një siguri dhe një ambient të qetë për të gjithë.

“Njëkohësisht Policia, falënderon qytetarët për bashkëpunimin e treguar në të mirë të sigurisë publike në përgjithësi”, theksohet në njoftimin e Policisë së Kosovës.