Prokuroria në Gjilan brenda një jave ka ndaluar nëntë të dyshuar

11 shkurt 11:32

Prokuroria Themelore në Gjilan, gjatë javës së kaluar, ka ndaluar nëntë persona të dyshuar, në kohëzgjatje prej 48 orëve, për vepra të ndryshme penale.

Është bërë me dije se Departamenti i përgjithshëm i kësaj prokurorie, ka ndaluar pesë persona, për shkak të dyshimit të veprave penale, “posedim i paautorizuar i narkotikëve, substancave psikotrope ose analoge”, “pengim i personit zyrtar gjatë kryerjes së detyrave zyrtare”, “detyrim”, “vjedhje e rëndë”, “kanosje” dhe “shtrëngim”.

Ndërsa, Departamenti i krimeve të rënda, ka ndaluar një person, për shkak të dyshimit se ka kryer veprën penale, “keqpërdorim seksual i personave nën moshën 16-vjeçare”.

Në anën tjetër, nga Departamenti për të mitur, janë ndaluar tre të mitur, për shkak të dyshimit se kanë kryer veprat penale “keqpërdorim seksual i personave nën moshën 16-vjeçare”, “vrasje në tentativë” dhe “lëndim i rëndë trupor”.

Prokuroria Themelore në Gjilan, brenda afateve ligjore, për të gjitha këto raste, ka paraqitur kërkesat për caktimin e masës së paraburgimit, në Gjykatën Themelore në Gjilan.

/Epoka e re/

Lajme të sponsorizuara