Pulëbardha e Kosovës
NAMIK SELMANI
Monologu i një vëllai kushtuar Fatmira Hasanit që në moshën 16-vjeçare u vra nga pushtuesit serbë në vitin 1998 në Likoshan të Drenicës (Kosovë)
O, breeee, kurrë nuk u bë nuse motra ime Fatmira!
E tupanët për të
Nuk u dëgjuan në Likoshan apo në mbarë Kosovën,
Sot
Doja ta dëgjoja një djep me zëra djemsh e çikash.
E gazmendi
Të më ngrohte në udhët gjarpërore të botës.
E nëna
Ah, do ta prekte trupin e ftohtë të bacës
Mooos, o Zot!
Me lotët e kukamës
Do ta rrokte në arkëmort Fatmirën e shtrirë
E qielli,
Do të çahej nga dhimbja si pala e dallgës
E plisi i bardhë
Do të thinjej dhe më nga mungesa e rrezes me dritë
Dhe ishte pulëbardhë motra ime
Me sëmundjen që ia kalli jetën e re që në agim
Dhe ish dallëndyshe
Që çerdhen ia kallën gjer në fijen e kashtës një agim
Dhe ishte zanë Fatmira ime
Që kishte një gjerdan me ëndrra të bukura për vajzërinë
Dhe ishte lule
E patharë në Bahçen e Kujtesës gjer në amshim
E unë
Ende pres këngën e pakënduar në dasmën e munguar.
Në kuqëlimin e çative
Bie bora e shkrin sërish pranverave të Kosovës
Aty,
Aty doja ta shtrija trupin e ta puthja livadhin e bleruar
Aty,
Doja ta ndërroja duhanin me bacën në oxhakun e odës.
Malli për të më merr
E dritat e Evropës veniten klithshëm para kujtimit të zjarrtë.
Sa do doja
Aty te pragu i Likoshanit të ma fshinte ballin me djersitje
Të ma sillte çajin dhe kafen në gjerbimin e rrallë.
E bashkë
Të thurnin pa nda me Kosovën ëndrra të reja lirie.
E vranë kuçedrat
Me gjuhën e zjarrtë që kallte atë trup të njomë,
I duhej Kosovës
Ajo shtatlistë e bukur hyjnore
I duhej nënës
Si motër e vogël që ta priste te pragu i ngrohtë
I duhej diellit
Që të kthehej në rreze të re engjëllore.
Fluturoj qiejve austriakë
E eci mes maleve që më lënë ca copëza dheu nëpër hapa.
E gjuhët e globit
Po përcjell në drita e semaforë me harqe vetëtimash.
Si Arkitekt i Ëndrrës
Dua sytë e motrës të mos fshihen pas një shtëllunge të bardhë
Dua të jetoj
Me krenarinë dhe dhimbjen që më jep kahmot motra ime Fatmira
(Kjo poezi është botuar në sprovën për antologji “Dritë mbi plagë”, botuar nga Qendra “Gjenocidi në Kosovë – Plagë e Hapur”, Gjenevë, 2020)