Lamih Balaj nga Sindikata e Telekomit ka paralajmëruar se nëse nuk do të zhbllokohen llogaritë e Telekomit, përveç protestave para qeverisë, sindikata do të mbajë edhe greva brenda dhe jashtë objekteve e që, sipas tij, kjo do të ketë pasoja.

“Këshilli i Grevave ka vendosur që të mos shkojë më në protestë para qeverisë, nëse shkohet me protestë do të ndryshojë kahe, nuk e di kah do të shkojmë. Nuk përjashtohen grevat brenda dhe jashtë objekteve, por nëse merren këta hapa nga sindikata, nuk do të jetë mirë as për ata që na lënë pa paga, nuk do jetë mirë për askënd, as ministrisë e qeverisë”, tha Balaj.

Balaj thotë se prokuroria duhet të hetojë të gjitha rastet në Telekom, teksa ka shtuar se Qeveria e ka vështirësuar gjendjen me Telekomin, sipas tij, me deklaratat se ndërmarrja po falimenton. “Qeveria na ka sjellë në atë gjendje. Ka dalë ka thënë se po falimenton Telekomi. Këtu duhet të futet prokuroria. Nëse ka prokurori, nuk duhet t’u besohet as qeverive që kanë qenë e as ministrave të kaluar. Duhet me hetu dhe të dihet pse thotë që po du me falimentu. Hajni të mëdha janë ba në Telekom”, tha ai.