Plani i paqes i Kinës për Ukrainën mund të përdoret si bazë për t’i dhënë fund luftës, ka thënë presidenti i Rusisë, Vladimir Putin.

Udhëheqësi rus u takua me presidentin kinez Xi Jinping të martën në Moskë për të diskutuar konfliktin dhe marrëdhëniet midis dy vendeve.

Putin tha se nisma e paqes mund të paraqitet “kur Perëndimi dhe Kievi të jenë gati”.

Plani i Kinës,  i publikuar muajin e kaluar, nuk kërkon që Rusia të largohet nga Ukraina. Duke renditur 12 pika, ai bën thirrje për bisedime paqeje dhe respekt për sovranitetin kombëtar.

Ukraina ka insistuar që Rusia të tërhiqet nga territori i saj, si kusht për çdo bisedim, shkruan BBC.

Pos kësaj, në takimin me Putin, Jinping ka bërë thirrje për “bisedime paqeje” dhe “dialog të përgjegjshëm” mbi Ukrainën në një deklaratë të përbashkët me homologun e tij rus. Por, ai gjithashtu kritikoi sanksionet, fajësoi zgjerimin e NATO-s për konfliktin dhe nuk bëri asnjë ofertë për të tërhequr forcat pushtuese.