Kryetari i shoqatës “Zëri i Prindërve”, Bajram Qerkini ka thënë se familjarët e personave të pagjetur janë jashtëzakonisht të zhgënjyer me mospunën e institucioneve. Madje sipas tij, nuk po punohet sa duhet, nga personat përgjegjës.

Ai ka deklaruar se përshkak të mosgjetjes së fëmijëve të tyre shumë nëna as gjumë nuk bëjnë, duke shtuar se edhe gruaja e tij thërret çdo natë “erdh djali”.

Qerkini foli edhe për një bisedë që pati me kryeministrin Albin Kurti, të cilit i kishte kërkuar më shumë punë, por ai i kishte thënë se po punon sa po mundet.

“Ne si familjarë jemi jashtëzakonisht të zhgënjyer, nuk është punuar ajo që është dashur dhe është ditur të punohet. Nuk ka send që nuk dihet, thotë se nuk ka të dhëna, por do punë dhe angazhim për zbardhjen e fatit të 1 600 personave. Prej Marinës deri në Bllacë kemi varreza, ka nis me u zbardhur çështja e të pagjeturve”, ka thënë Qerkini.

“Edhe 132 fëmijë janë të pagjetur. Ka shumë nëna që nuk flenë, edhe gruaja jem bërtet çdo natë, erdh djali. Unë them që çdo gjë e dinë, por nuk po punojnë. Ju kisha lut mos na harroni neve familjarëve. Ende që dy vjet nuk e kanë realizuar një bisedë, i thash mos me thuaj pse po më kritikon, më tha sa di e bëj, i thash jo ti di shumë”, ka shtuar Qerkini.