Qeveria e Kosovës e ka miratuar zgjatjen e masave emergjente për furnizimin me energji elektrike, ku përfshiheshin edhe kufizimet në furnizimin me energji elektrike për konsumatorët (reduktimet).

Zëvendësministri i Ekonomisë, Mentor Arifaj, ka thënë në mbledhjen e sotme të qeverisë se masat e marra në dhjetor të vitit të kaluar të vlefshme 60 ditë, kishin ndikuar pozitivisht në sigurinë e furnizimin me energji elektrike, ndërsa ka kërkuar që ato të vazhdojnë edhe për 30 ditë.

“E kemi një propozim-vendim për zgjatjen e masës së energjisë për furnizim me energji edhe për 30 ditë tjera për shkak se masat e ndërmarra nga qeveria më 24 dhjetor dhe miratimin nga Kuvendi më 29 dhjetor 2021 patën ndikuar pozitivisht në ruajtjen e sigurisë së furnizimit me energji elektrike në rrethanat e një krize energjetike që e patëm”, ka thënë ai.

Arifaj ka arsyetuar propozimin edhe duke përmendur rrezikun e lartë, që ka thënë se ekziston ende në mundësinë që termocentralet “Kosova A” dhe “Kosova B” të bien apo të pësojnë defekte.

“Mirëpo vjetërsia e stabilimenteve që i kemi në termocentralet ‘Kosova A’ dhe ‘Kosova B’, përkatësisht mundësia që ato të bien ose të pësojnë defekte duhet ta konsiderojmë si një rrezik i lartë për të siguruar furnizimin me energji elektrike”, ka thënë ai.

Zëvendësministri ka përmendur edhe situatën në Ukrainë, si një prej faktorëve që mund të ndikojë në çmimet e energjisë elektrike në tregun evropian.

“Situata e krijuar rreth Ukrainës e shton edhe më tej paparashikueshmërinë e çmimeve të energjisë në tregun evropian të energjisë, andaj konsiderojmë se është e nevojshme që të vazhdohet me masat emergjente të furnizimit me energji elektrike me një afat shtesë edhe prej 30 ditëve”, ka thënë Arifaj.

Përveç reduktimeve, masat emergjente në furnizim me energji përfshijnë edhe vendosjen e obligimeve të veçanta për ndërmarrjet e energjisë.