Njeriu i afërt i ministrit të Jashtëm në detyrë, Behgjet Pacolli, është rrugës për t’u bërë konsull i Kosovës në Suedi.

Sheqir Kutllovci është propozuar për konsull në shtetin skandinav, i cili në shumë aktivitete partiake është parë bashkë me Pacollin e figura të tjera të AKR-së.

Në fakt, Kutllovci për periudha të ndryshme ka shërbyer si këshilltar i ish-ministrit të Brendshëm, Bejtush Gashi, dhe këshilltar i ish-ministres së Mjedisit, Albena Reshitaj.

Kutllovci ka konfirmuar për KTV-në se është propozuar për konsull, por që nuk ka dhënë detaje të tjera.

“I nderuar, jam i propozuar më herët për konsull në Suedi. Për informata të tjera mund të drejtoheni në MPJ”, ka thënë Kutllovci.

Derisa, në Ministrinë e Punëve të Jashtme, kanë thënë se nuk ka për momentin vendim që e emëron Kutllovcin konsull.

“Në Ministrinë e Punëve të Jashtme nuk është marrë asnjë vendim, dhe si rrjedhojë, nuk është ndjekur asnjë procedurë për emërimin Konsull të z.Sheqir Kutllovci”, ka thënë Zyra për Media e MPJ-së

Përgjigje të ngjashme ka dhënë edhe sekretari i Përgjithshëm i Ministrisë së Jashtme, Fitim Sadiku.

“Ne nuk kemi pranuar kurrfarë vendimi nga Zyra e Ministrit për emërimin e z. Kutllovci për konsull. Vendimet që merren nga ministri, përcillen te sekretari i Përgjithshëm për ekzekutim”, ka thënë Fitim Sadiku.

Televizioni ka dërguar pyetje edhe në adresë të Zyrës së presidentit Hashim Thaçi, nëse MPJ-ja ka dërguar emrin e Sheqir Kutllovcit për dekretim konsull i Kosovës në Suedi, por nuk ka kthyer përgjigje.

KTV-ja ka raportuar në vazhdimësi për emërimet e këshilltarëve politikë e njerëzve të afërt me partinë e Behgjet Pacollit, AKR-së, nëpër misione diplomatike, përfshirë muajt e fundit kur Qeveria është vetëm në detyrë dhe e dorëhequr.