Qeveria e re duhet ta formojë sa më parë Gjykatën komerciale për të pasur siguri juridike, pasi mungesa e sundimit të ligjit mbetet një ndër arsyet kryesore pse nuk ka investime në Kosovë.

Kështu ka thënë kryetari i Odës Ekonomike të Kosovës, Berat Rukiqi, i cili ka mirëpritur planin e Qeverisë Hoti për trajtimin e ndërmarrjeve publike, veçanërisht për privatizimin e Telekomit të Kosovës.

Rukiqi ka thënë se për të mos pasur pakënaqësi sociale të qytetarët, qeveria duhet sa më parë ose deri në fund të këtij muaj t’i implementojë tërësisht masat e Pakos Emergjente Fiskale, për të filluar me rimëkëmbjen ekonomike nga korriku.

Sipas tij, Kosova është një ndër vendet që ka pësuar më së shumti nga pandemia Covid-19 dhe pritjet e sektorit privat nga qeveria e re, ndërlidhen me veprimet e rimëkëmbjes ekonomike.

“Në bazë të raporteve ndërkombëtare dhe analizave tona aq sa kemi pa në sektorin privat, Kosova do të jetë një ndër vendet më të prekur në aspektin ekonomik sa i përket ndikimeve ekonomike apo ndikimeve të pandemisë në ekonominë e vendit. Ai 5 për qindshi që parashihet të jetë tkurrje ekonomike sigurisht se duhet të rikuperohet, por nuk mund të rikuperohet pa veprime konkrete e efikase të qeverisë së vendit për mes një pako për rimëkëmbje ekonomike. Prandaj, pritjet e sektorit privat në raport me këtë qeveri që është zgjedhur javën e kaluar lidhet drejtpërdrejt me veprimet që do t’i ndërmerr për rimëkëmbjen ekonomike”, ka thënë Rukiqi për “Kosovapress”.

Lidhur me vonesat e zbatimit të Pakos Emergjente veçanërisht për punëtorët dhe bizneset, kryetari i OEK-ut, ka thënë se edhe pse ka humbur kuptimin pakoja “e famshme” emergjente, deri në fund të këtij muaj duhet impementohet e tëra, për të filluar nga korriku me masat e rimëkëmbjes.

Kryetari i OEK-ut ka vlerësuar programin e qeverisë për trajtimin e ndërmarrjeve publike, sidomos privatizimin e Telekomit dhe për sundim të ligjit që lidhen me gjykatën komerciale e cila ka ngecë në vazhdimësi.

“E vlerësoj programin në pikën që do të trajtojë edhe pjesën e ndërmarrjeve publike sidomos privatizimin e Telekomit, diçka që ka ngecë dhe që është koha e fundit që ndoshta të mendohet të shpëtohet kjo kompani përmes një ristrukturimi fillimisht apo për mundësitë e futjes së kapitalit privat. Po ashtu e vlerësoj fokusin pastaj te pjesa e sundimit të ligjit që lidhen me gjykatën komerciale dhe me disa veprime që duhet me u ndërmarrë për shkak se siguria juridike mbetet një ndër arsyet kryesore pse s’ka investime në vend. Megjithatë, mund të ketë ngecje në zbatim. Ajo që Kosovës i duhet dhe që i ka munguar që pesë vjet një dinamikë e shtuar, është ajo e miratimit të ligjeve dhe reformave të duhura që munden me ndihmua sektorin privat”, ka thënë Rukiqi.