Sindikata e Bashkuar e Arsimit, Shkencës dhe Teknologjisë ka njoftuar se punëtorët e arsimit po vazhdojnë të jenë të përkushtuar për realizimin e misionit të tyre pavarësisht prej situatës së re të krijuar nga koronavirusi.

Në një njoftim për media, SBAShK-u bën me dije se nga 11 marsi e tutje punëtorët e arsimit kanë krijuar rrjete komunikimi me nxënësit dhe me prindërit, duke vazhduar procesin mësimor në rrethana të reja.

“Ky komunikim po mundëson që të bashkëbisedohet për njësitë mësimore të përgatitura nga MASHTI e që po prezantohen në RTK, por janë të shumta rastet kudo në Kosovë që edhe mësimdhënësit po përgatisin njësi mësimore sipas planit dhe ato po i plasojnë në rrjete sociale duke komunikuar në të njëjtën kohë me nxënësit e tyre për të dhënë edhe detyra e duke i kontrolluar ato. SBASHK-u është në takime të vazhdueshme nga larg me stafin qendror, por edhe me veprimtarë sindikal nga Arsimi Parauniversitar dhe Universitetet duke u dhënë mbështetje e duke përgëzuar gjithë punëtorët e arsimit që edhe në rrethana të vështirësuara, nuk janë larguar për as një moment nga misioni i tyre i shenjtë, por vazhdojnë punën me përkushtim e zell duke i dhënë forcë e vlerë trekëndëshit të famshëm mësimdhënës-nxënës-prindër e duke mundësuar kështu vazhdimin e procesit edukativ e arsimor”, thuhet në njoftim.

Po ashtu, bëhet me dije se SBAShK-u mban takime të përditshme me stafin qendror dhe me kryetarët e nivelit komunal sindikal dhe të universiteteve nëpërmjet lidhjeve online.

Në njoftim thuhet se takimet e tilla do të vazhdojnë fillimisht me kolegët sindikalistë nga komunat që janë më të prekura nga koronavirusi në mënyrë që bashkërisht të shtrojnë ide e të angazhohen për kryerjen e misionit të shenjtë të mësuesit edhe në këto kohë të vështira.

“Punëtorët e arsimit janë dëshmuar në të kaluarën e po dëshmohen edhe tani se qëndrojnë në ballë të angazhimeve duke realizuar misionin e tyre dhe obligimin e tyre për arsimimin dhe edukimin e brezave pavarësisht sfidave dhe vështirësive të kohës. SBAShK-u në kuadër të angazhimeve në shërbim të arsimit në këto rrethana të reja është duke komunikuar me psikologë e pedagogë shkollash me qëllim që bashkërisht të krijojnë mundësi që prindërit të komunikojnë me ta nga larg për të marrë përgjigje profesionale për çështje të veçanta”, thuhet në njoftim. /Epoka e re/