Ish-komandanti i njësitit “Pëllumbi” dhe deputeti i PDK-së, Ferat Shala, ka përkujtuar 21 dëshmorët e këtij njësiti të UÇK-së.

Shala duke kujtuar edhe 36 martirët të cilët së bashku më 21 dëshmorët prehen në kompleksin memorial në Negroc të Drenasit, ka thënë se lufta e UÇK-së ka qenë dhe mbetet e drejtë, çlirimtare dhe e pastër!

“Sot në përvjetorin e rënies së 21 dëshmorëve të UÇK-së – njësiti ‘Pëllumbi’ , dhe 36 martirëve , bashkë me bashkëluftëtarët, vendosëm kurora lulesh, duke nderuar luftën dhe jetën e tyre. Sa më shumë që ikin vitet, aq më shume po rritet malli dhe respekti për ta. Aq më shumë po kristalizohet dhe vlerësohet lufta e lavdishme e Ushtrisë Çlirimtare të Kosovës. Sot, është viti i dytë kur ne në Negroc, vendlindjen e Jakup Krasniqit, vendosim lulet dhe kujtojmë dëshmorët e martirët pa prezencën e tij, i cili padrejtësisht bashkë me bashkëluftëtarët e tjerë, po gjykohen padrejtësisht në Hagë. Por, mësuesi Jakup, dhe bashkëluftëtarët e tij janë me ne, e ne jemi me ta siç kemi qenë gjithherë kur e kërkonte koha dhe atdheu. Lufta jonë ka qenë dhe mbetet e drejtë, çlirimtare dhe e pastër!”, ka shkruar Shala në “Facebook”.