ShBA-ja do të vendosë taksë ndaj mallrave evropiane
Presidenti i Shteteve të Bashkuara të Amerikës (ShBA), Donald Trump, ka thënë se do të vendosë taksë ndaj mallrave të Bashkimit Evropian (BE) që kapin vlerën e 11 miliardë dollarëve.
Zyrtarët e ShBA-së, të hënën, e kanë bërë publike listën paraprake të mallrave që do t’i nënshtrohen taksës. Aty përfshihen, që nga pjesët e aeroplanëve deri të djathi, verërat dhe ullinjtë.
Kjo listë do të jetë subjekt i komenteve publike në pritje të vendimit të arbitrazhit të Organizatës Botërore të Tregtisë.
Shtetet e Bashkuara të Amerikës (ShBA) që nga viti 2004 pretendojnë se Bashkimi Evropian po subvencionon kompaninë për prodhimin e aeroplanëve “Airbus”, duke shkaktuar kështu efekte negative në prodhuesin amerikan të aeroplanëve “Boing”.
Organizata Botërore e Tregtisë vendosi majin e kaluar se BE-ja në fakt kishte dhënë disa subvencione të paligjshme për “Airbus”, duke dëmtuar prodhuesin amerikan Boing.
Në anën tjetër BE-ja pretendon se edhe “Boeing”-u ka përfituar nga mbështetja e ngjashme e Qeverisë amerikane.
Shtetet e Bashkuara të Amerikës (ShBA) presin që arbitrazhi i Organizatës Botërore të Tregtisë gjatë muajve të ardhshëm, të vendosë përfundimisht për këtë çështje.