Departamenti Amerikan i Shtetit i hoqi të enjten udhëzimet e lëshuara për të “mos udhëtuar” në rang botëror, masë kjo që u mor në muajin mars me anë të së cilës u rekomandohej qytetarëve amerikanë t’i shmangnin udhëtimet ndërkombëtare për shkak të pandemisë së koronavirusit. ShBA-ja lëshoi paralajmërime individuale të nivelit të lartë për rreth 30 vende, raporton “Reuters”.

“Me përmirësimin e kushteve të shëndetit dhe sigurisë në disa vende dhe përkeqësimin potencialisht në disa të tjera, Departamenti po kthehet te sistemi i mëparshëm – te këshillat e udhëtimit për vende specifike”, thuhej në deklaratë.

Aksionet e kompanive amerikanë u rritën pas njoftimit.

Departamenti i Shtetit lëshoi njoftime specifike për udhëtimet drejt 30 vendeve, përfshirë këshilla të “nivelit të katërt, mos udhëtoni!”, mes tyre India, Rusia, Bangladeshi, Belize, Bolivia, Kosta Rika, Republika Domenikane, Egjipti, El Salvadori, Haiti, Irani, Kosova, Kazakistani, Mongolia, Hondurasi dhe Libia.

Departamenti i Shtetit lëshoi gjithashtu këshilla të reja të “nivelit të 3-të: rishqyrtoni udhëtimin” duke përfshirë vendet anëtare të Bashkimit Evropian, Mbretërinë e Bashkuar, Vietnamin, Sri Lankën, Liberinë, Armeninë, Filipinet, Laosin dhe Australinë.

SHBA kanë ndaluar shumicën e shtetasve jo-amerikanë që të udhëtojnë drejt Shteteve të Bashkuara, përfshirë vendet e BE-së dhe Kinën.

Shqipëria është e renditur në shkallën e tretë të rrezikut nga Covid-19 dhe i sugjeron shtetasve të saj të marrin në konsideratë nëse duan të udhëtojë apo jo.

Departamenti i Shtetit e lëshoi për herë të parë paralajmërimin e “nivelit, mos udhëtoni” më 19 mars për shkak të rreziqeve mbi shëndetin publik.