SHBA-të tërheqin 5 mijë trupa nga Gjermania, demokratë e republikanë të shqetësuar: Sinjal i rrezikshëm
Dy ligjvënës të lartë republikanë në SHBA kanë kritikuar një vendim të Pentagonit për të reduktuar me 5 mijë numrin e trupave amerikane të stacionuara në Gjermani, duke thënë se kjo rrezikon të minojë efektin parandalues dhe dërgon sinjalin e gabuar drejt Rusisë.
Roger Wicker dhe Mike Rogers, që drejtojnë përkatësisht komitetet e shërbimeve të armatosura në Senat dhe në Dhomën e Përfaqësuesve, thanë se në vend që të tërhiqen, këto trupa duhet të zhvendosen më në lindje.
Zëdhënësi i Pentagonit, Sean Parnell, tha të premten se vendimi erdhi pas një rishikimi të plotë dhe merrte parasysh “kërkesat e teatrit dhe kushtet në terren”.
Të shtunën, presidenti Donald Trump tha se mund të ketë shkurtime të mëtejshme, pa dhënë detaje. SHBA-të kanë më shumë se 36 mijë trupa aktive në Gjermani. Ministri i Mbrojtjes i Gjermanisë tha se vendimi i Pentagonit ishte “i parashikueshëm”.
Duke folur për agjencinë e lajmeve DPA, Boris Pistorius theksoi gjithashtu se “prania e ushtarëve amerikanë në Evropë, dhe veçanërisht në Gjermani, është në interesin tonë dhe në interesin e SHBA-ve”.
Aleanca ushtarake e NATO-s tha se po kërkon sqarime nga Uashingtoni.
Në një deklaratë të përbashkët, Wicker dhe Rogers thanë se ishin “shumë të shqetësuar nga vendimi për të tërhequr një brigadë amerikane nga Gjermania”, ndërsa aleatët evropianë po lëvizin drejt rritjes së shpenzimeve për mbrojtjen si pjesë e Prodhimit të Brendshëm Bruto (PBB).
“Reduktimi i parakohshëm i pranisë së Amerikës në Evropë përpara se këto kapacitete të realizohen plotësisht rrezikon të minojë parandalimin dhe të dërgojë sinjalin e gabuar te Vladimir Putin,” thuhej në deklaratë.
“Në vend që të tërhiqen forcat nga kontinenti, është në interesin e Amerikës të ruajë një efekt të fortë parandalues në Evropë duke zhvendosur këto 5 mijë trupa drejt lindjes.”
Demokrati më i lartë në komitetin e shërbimeve të armatosura në Dhomën e Përfaqësuesve, Adam Smith, tha se vendimi “nuk bazohet në ndonjë politikë koherente të sigurisë kombëtare, strategji apo analizë”, por në “ndjenjat e lënduara të një presidenti që kërkon hakmarrje politike”.
