Kryetari i Komunës së Prishtinës, Shpend Ahmeti, ka thënë se duke filluar nga dhjetori, qytetarët prapë do të ballafaqohen me ndotjen, por, sipas tij, kësaj radhe maskat e Covidit do të ndihmojnë në zvogëlimin e sëmundjeve respiratore, e të cilat do të ishin edhe më të rrezikshme në kohë të pandemisë, raporton “Epoka e re”.

Ai ka thënë se gjatë periudhës së ndotjes marrim tepër shumë komente nga qytetarët për zgjidhje afatshkurtër e të cilat për ndotje janë të pamjaftueshme për ta zbutur situatën.

“Sa i përket ndotjes, ka gjëra të cilat nuk mund t’i ndryshojmë, e ato janë aspektet gjeografike, kushtet e përgjithshme klimatike, dhe natyrisht kushtet meteorologjike. Por ka dy gjëra që mund t’i ndryshojmë. Ngrohjen me thëngjill në shtëpi individuale, të cilën po e adresojmë me Termokos, kur në periudhë pesëvjeçare shumica e madhe e pjesës urbane të kryeqytetit do të jetë e kyçur në ngrohjen qendror. E dyta janë numri i veturave në qytet. Meqenëse rrugët janë të ngushta dhe nuk mund të zgjerohen në qendër, atëherë zgjidhja e vetme mbeten ndërtimi i rrugëve alternative (unaza) dhe pagesa e taksës për lëvizje me makinë në pjesë të populluara të qytetit ku ka tollovi dhe që mund të shkaktojnë ndotje”, ka shkruar Ahmeti në llogarinë e vet në “Facebook”.

Ai ka shtuar se për vikend kishte shumë diskutime në rrjetet sociale se si Komuna e Prishtinës po do të vendos rampa në kryeqytet për të penalizuar qytetarët e komunave tjera.

“Nuk e di a ka qenë i qëllimshëm ky keqinterpretim, por nuk është hera e parë që flasim për këtë punë. Pra përveç parkingut me pagesë, ne kemi shqyrtuar edhe mundësinë e taksës për lëvizje me makinë në qendër. Në gjuhën angleze njihet si Congestion Charge (takse e tollovisë në njëfarë mënyre). Londra është kryeqyteti që e ka rregulluar më së miri këtë sistem. Nuk ka rampa (laura), nuk ka diskriminime, kur të vendoset kjo politikë vlen për të gjithë dhe implementohet me kamera. Thjeshtë në një qytet të vogël ku mundesh me ec në këmbë prej njërës anë në tjetrën për 30 minuta dhe me ndotje serioze gjatë dimrit, prioritet duhet ta kemi luftimin e përdorimit të panevojshëm të veturave. Prioritet mbi prioritete është shëndeti i qytetarëve”.

“Jemi kryeqytet dhe jemi të lumtur të jemi nikoqir i krejt atyre që vijnë për të na vizituar, për të kryer punë dhe për të jetuar në Prishtinë. Duam veçse ta bëjmë më të jetueshëm dhe më të shëndetshëm kryeqytetin për të gjithë neve. Prandaj krahas kësaj po punohen parkingjet edhe në hyrje të qytetit për ata që nuk duan të mendojnë parkimin e veturës. Transportin publik do ta kenë falas, me biletën e parkingut”, ka shkruar Ahmeti.