Një projekt që përfshin gjithë Ballkanin, për t’i pajisur rrugët kryesore të gadishullit me stacione ngarkimi për automjetet elektrike. Ky është plani i kompanisë bullgare “Eldrive”, e cila synon të bëhet lider i këtij shërbimi në rajon.

Kohët e fundit, kompania ka shtrirë operacionet e saj edhe në Rumani, pas disa viteve në tregun vendas dhe synon që brenda verës së ardhshme ta mbulojë Bukureshtin me pika për ngarkimin e makinave.

Objektivi është që fillimisht të mbulohen autostradat më të rëndësishme dhe akset nacionale më të frekuentuara që kalojnë përmes Shqipërisë, Maqedonisë dhe Greqisë, duke bërë edhe lidhjen me Bullgarinë e Rumaninë, shkruan “scantv”.

Për të realizuar këto plane, “Eldrive” mbështetet në tregun bullgar, i cili është ai me rritjen më të shpejtë të shitjeve për automjetet me bateri, si edhe nga partneriteti me kompani tregtuese të karburantit, për të instaluar stacione edhe në pikat e tyre.

Në rast të plotësimit të këtyre planeve, një nga përfituesit kryesorë do të ishte edhe Shqipëria, e cila vuan nga mungesa e qendrave të tilla të ngarkimit. Sipas një raporti të fundit të Tetorit 2017, në vendin tonë numërohen vetëm 2 pika ngarkimi super të shpejtë, duke u renditur të fundit në Evropë, së bashku me Bosnje dhe Hercegovinën.

Vendosja e stacioneve në rrugët kryesore nacionale do të mundësonte udhëtimin drejt vendit tonë edhe me automjete elektrike, pa krijuar vështirësi apo humbur kohë për t’i ngarkuar.