Një rrokaqiell që strehon zyrat e gjigantit shtetëror të naftës në Arabinë Saudite, Aramco, është dëmtuar nga një sulm me raketa dhe dronë i rebelëve Houthi të Jemenit.

Grupi pretendoi se sulmi i së dielës ishte në shenjë hakmarrjeje ndaj sulmeve të kryera gjatë fundjavës nga koalicioni i udhëhequr nga Arabia Saudite, të cilat, sipas raportimeve, shkaktuan mbi 50 viktima, mes tyre gra dhe fëmijë.

Kulla Aramco, e vendosur në Distriktin Financiar King Abdullah në Riad, pësoi dëme të dukshme në disa kate. Nga shpërthimet u thyen dritaret, u shkatërruan pjesë të fasadës prej xhami dhe mbetën të ekspozuara strukturat e brendshme të ndërtesës.

Pamjet që qarkulluan në internet treguan dëme të konsiderueshme në pjesën e jashtme të rrokaqiellit, ndërsa dëshmitarët raportuan se kishin dëgjuar disa shpërthime në zona të ndryshme të kryeqytetit saudit. /A2