Bashkimi Evropian njoftoi të premten se po dërgon qindra gjeneratorë shtesë në Ukrainë për të garantuar furnizimin me energji elektrike për objektet kyçe, në një kohë kur sulmet e vazhdueshme ruse kanë lënë miliona qytetarë pa energji, ujë dhe ngrohje gjatë temperaturave ekstreme të dimrit.

Sipas Komisionit Evropian, mbi një milion ukrainas aktualisht ndodhen pa energji elektrike, ujë dhe ngrohje, si pasojë e goditjeve të përsëritura ndaj infrastrukturës energjetike të vendit. Në këtë kuadër, BE-ja po vendos 447 gjeneratorë emergjence, me një vlerë totale prej 3.7 milionë eurosh, nga rezervat e saj strategjike.

Gjeneratorët do të përdoren për furnizimin me energji të spitaleve, strehimoreve dhe shërbimeve kritike, ndërsa komisionerja evropiane për menaxhimin e krizave, Hadja Lahbib, tha se sulmet ruse po i privojnë qëllimisht civilët nga shërbimet bazë në mes të dimrit të ashpër.

Ndërkohë, presidenti ukrainas Volodymyr Zelensky deklaroi javën e kaluar shpalljen e një “gjendjeje të jashtëzakonshme” në sektorin e energjisë, pas sulmeve intensive ndaj furnizimit me ngrohje dhe energji elektrike, teksa temperaturat në disa zona kanë zbritur deri në -20 gradë Celsius.