Tahiri akuzon Vuçiqin për të pagjeturit

25 shkurt 15:28

Ministri i Drejtësisë, Abelard Tahiri, ka thënë se presidenti i Serbisë, Aleksandër Vuçiq, është treguar indiferentë për ofrimin e informatave për të pagjeturit.

“Megjithatë, kjo indiferencë për asnjë moment nuk do të na ndalojë që të bëhemi edhe më këmbëngulës dhe të pakompromis në zgjidhjen e kësaj çështje”, ka shkruar Tahiri në llogarinë e vet në “Facebook”.

Postimi i plotë i Tahirit:

Republika e Kosovës ka hyrë në dekadën e dytë me vizion dhe shpresa të reja, por assesi duke harruar çështjet që kemi trashëguar dhe për të cilat, duhet të përpiqemi më shumë se kurrë.

Ndriçimi i fatit të personave të zhdukur, si një prej çështjeve më të ndjeshme që fatkeqësisht mban peng edhe sot e kësaj dite shumë familje kosovare, është preokupim i vazhdueshëm i imi si ministër i Drejtësisë.

Kam diskutuar me Kryetarin e Komisionit për Persona të Zhdukur, z. Prenk Gjetaj dhe Kryetarin e Shoqatës “Zëri i Prindërve” z. Bajram Qerkini, për obligimet tona institucionale dhe hapat që duhet ndërmarrë më tutje që kjo temë të marrë një epilog, sa më parë që është e mundur. Përkushtimi dhe mbështetja ime për të adresuar preokupimet e familjeve të personave të zhdukur, nuk do rresht për asnjë moment.

Tashmë është e qartë se adresa e vërtetë e këtij problemi, është presidenti i Serbisë, Aleksandër Vuçiq, i cili është duke treguar indiferencë dhe mos gatishmëri për të nxitur organet serbe që të bashkëpunojnë me institucionet tona, për të ofruar informata dhe dëshmi mbi fatin e të zhdukurve.

Megjithatë, kjo indiferencë për asnjë moment nuk do të na ndalojë që të bëhemi edhe më këmbëngulës dhe të pa kompromis në zgjidhjen e kësaj çështje.

Në ditët në vijim, do të angazhohemi së bashku me të gjitha institucionet dhe shoqatat e familjarëve për të zgjeruar agjendën e përpjekjeve institucionale, deri sa të marrin përgjigje edhe 1652 rastet e evidentuara, në mesin e të cilave, 130 fëmijë, për të cilët duhet të ketë një adresë.

Lajme të sponsorizuara

Të fundit
Instituti Hidrometeorologjik i Kosovës (IHMK) ka njoftuar se fushat me…